Naýqas adammen baılanysqa túspegen pavlodarlyq áıelden koronavırýs anyqtaldy
PAVLODAR. QazAqparat – Pavlodar oblysynyń ákimdigi óńirde koronavırýsty juqtyrýdyń tirkelgen jańa deregi týraly aıtty, dep habarlaıdy QazAqparat.
Aıta keteıik, 14 sáýirdegi sońǵy málimetterge sáıkes, Qazaqstanda koronavırýs indetin juqtyrǵan taǵy 33 adam tirkeldi. Onyń ishinde Pavlodar oblysynda 1 adam bar.
«Syrqat 50 jastaǵy Pavlodar turǵyny. 10 sáýir kúni jedel járdem brıgadasy jeke qorǵaný quraldyn qoldaný arqyly, JRVI belgileri bar áıel adamdy ýaqytsha gospıtalge jetkizdi. COVID-19-ǵa alynǵan test teris nátıje kórsetti. Naýqasqa «ókpeniń qabynýy» dıagnozy qoıyldy. Emdeý hattamasyna sáıkes, ókpe qabynýy bar naýqastardan úshinshi táýlikten keıin qaıta analız alynady. 14 sáýir kúni COVID-2019-ǵa alynǵan taldaý qorytyndysy oń nátıje kórsetti», - delingen oblys ákimdiginiń málimetinde.
Naýqas áıeldiń sózinshe, ol elden eshqaıda shyqpaǵan jáne koronavırýs juqtyrǵan adamdarmen baılanysta bolmaǵan.
«Onymen baılanysta bolǵan tulǵalar anyqtaldy. Olardy oqshaýlaý boıynsha jumystar jasalýda. Epıdemıologııalyq tekserý jalǵasyp jatyr», - delingen aqparatta.
Pavlodar oblysynda indetti juqtyrýdyń barlyǵy 11 oqıǵasy anyqtaldy. El boıynsha naýqastar sany - 1232 adam.
