Naýqan bastaldy: Túrkistan oblysynda 7 myń gektar jerge kókónis egildi

ASTANA. KAZINFORM — Óńirdiń ońtústik aýdandarynda kóktemgi dala jumystaryna qyzý daıyndyq bastaldy. Qazirdiń ózinde josparlanǵan 18,2 myń gektar jerdiń 7 myń gektaryna erte pisetin kókónister men kartop egildi, dep habarlaıdy Aýyl sharýashylyǵy mınıstrliginiń baspasóz qyzmeti.

Jalpy, bıylǵy jyly aýyl sharýashylyǵy daqyldarynyń egis alqaby 8 myń gektarǵa ulǵaıyp, 919 myń gektardy qurady. Onyń ishinde 536 myń gektar — jazdyq daqyldarǵa, 208 myń gektar — kúzdik egiske, 175 myń gektar — kópjyldyq shópterge, onyń ishinde jońyshqaǵa tıesili.

Oblystyq aýyl sharýashylyǵy basqarmasynyń basshysy Faızýlla Baıdýllaevtyń aıtýynsha, bıyl egis qurylymyn ártaraptandyrý jáne sý resýrstaryn tıimdi paıdalaný maqsatynda maqta alqaby 17 myń gektarǵa ulǵaıtylyp, 162 myń gektarǵa jetkizildi. Júgeri 15 myń gektarǵa artyp, 55,2 myń gektardy, al maqsary 16 myń gektarǵa kóbeıip, 85,4 myń gektardy qurady. Sonymen qatar sýdy tutyný kólemin azaıtý maqsatynda kúrish alqaby 7 myń gektarǵa qysqartyldy, bıdaı egistigi 25 myń gektarǵa azaıtylyp, 216,3 myń gektar boldy.

Qazirgi tańda jer jyrtý jumystary 82 paıyzǵa, topyraq shaıý 52 paıyzǵa oryndaldy. Jumys jalǵasyp jatyr. Bıyl 203,5 myń tonna mıneraldyq tyńaıtqysh engizý josparlanyp otyr. Oblystyq bıýdjetten 134 myń tonna tyńaıtqyshty sýbsıdııalaýǵa 9,5 mlrd teńge bólindi. Kóktemgi dala jumystaryn qarjylandyrý «Agrarlyq nesıe korporatsııasy» arqyly júzege asyrylyp jatyr. Búgingi kúni 8,4 mlrd teńgege ótinimder maquldanyp, 7,2 mlrd teńge kóleminde 321 joba qarjylandyryldy. Qosymsha 15 mlrd teńgege ótinimder qaralyp jatyr.

— Naýqanǵa 37,4 myń birlik aýyl sharýashylyǵy tehnıkasy jumyldyrylady. Memlekettik qoldaý sharalarynyń arqasynda byltyr 1 872 tehnıka satyp alynyp, tehnıkalyq parktiń jańarý deńgeıi 9,2 paıyzǵa jetti. Bıyl taǵy 2 029 tehnıka satyp alý kózdelgen. Jalpy, Túrkistan oblysynda kóktemgi dala jumystaryn júıeli jolǵa qoıylyp, sala mamandary janar-jaǵarmaımen, tyńaıtqyshtarmen, tuqymmen jáne tehnıkamen kezeń-kezeńimen qamtamasyz etilip keledi, — delingen habarlamada.

Osyǵan deıin Túrkistanda 40-qa jýyq kásipkerdiń demalys aımaqtary salynǵan jerleri daýǵa qalǵanyn jazǵanbyz.