Náýbet jyldary Aqmola oblysynda 1,5 myń adam atylǵan

KÓKShETAÝ. QazAqparat - Kókshetaýda jergilikti mádenı ortalyqtar men qoǵamdyq uıymdardyń ókilderi, memlekettik mekemelerdiń, oqý oryndary qyzmetkerleriniń qatysýymen saıası qýǵyn-súrgin qurbandaryn eske alý kúnine arnalǵan shara ótti, dep habarlaıdy «QazAqparat» HAA tilshisi.

«Dostyq» mádenıet úıinde uıymdastyrylǵan sharada «Alashtyń uly tulǵalary» atty bıyl qurylǵanyna 1 ǵasyr tolyp otyrǵan qazaq eliniń táýelsizdigi jolynda kúresken alash arystary men halyqqa tanymal tulǵalardyń portretteri men alash tarıhyna qatysty sýretterdiń kórmesi usynyldy. Ótken ǵasyrdyń 30-shy jyldaryndaǵy mıllıondardyń ómirin jalmaǵan asharshylyq pen saıası qýǵyn-súrginge arnalǵan beınefılm de kórsetildi. Odan ári saıası qýǵyn-súrgin qurbandary bir mınýt únsizdikpen eske alyndy

Sharaǵa qatysqan Aqmola oblysy ákiminiń orynbasary Nurlan Nurkenov sóz sóılep, 1998 jyldyń 31 mamyrynan bastap Elbasynyń bastamasymen elimizde saıası qýǵyn-súrgin qurbandaryn eske alý kúni bolyp sanalatyn aıta kele, taǵylymdy sharanyń mańyzdylyǵyna toqtaldy.

«30-shy jyldardaǵy asharshylyqta qazaq halqynyń qyryq paıyzdaı qyryldy, al saıası qýǵyn-súrgin kezinde júz myńnan astam adam jazyqsyz sottalsa, olardyń  25 myńy atyldy. Onyń ishinde Aqmola oblysynda  5,4 myń adam sottalyp, olardyń 1,5 myń atyldy»  - dedi N.Nurkenov óz sózinde.

Sonymen qatar, stalındik solaqaı saıasattan zardap shekender men qurban bolǵandardyń búgingi urpaqtary Aqmola oblystyq  «Vaınah» sheshen-ıngýsh qoǵamynyń tóraǵasy Gerıhan ıAndıev, «Oblystyq polıaktar qoǵamy» qoǵamdyq birlestiginiń tóraǵasy Aleksandr Sýhovetskıı qıyn kezde ata-babalaryna qol ushyn berip, qoldan kelgen kómekterin aıamaǵan qonaqjaı qazaq halqyna degen sheksiz alǵysyn bildirdi.

Shara oblystyq fılarmonııanyń ánshisi Sársenbaı Hasenovtyń  náýbetke arnalǵan tolǵaýymen máresine jetti.