Naýbaıhanashy demalyssyz jumys jasaǵany úshin sotqa tartyldy
ASTANA. QazAqparat - Frantsııadaǵy «Úzdik nan - 2014» tıtýlynyń jeńimpazy Stefan Kaznav tynymsyz jumys jasaǵany úshin aıypty dep tanylyp otyr. Onyń nan dúkeni aptasyna 7 kún boıy jumys jasaıdy, al buǵan Frantsııa zańynda tyıym salynǵan.
«Eńbek ınspektory eki ret kelip meni tergep ketti, tipti polıtsııa da suraqtyń astyna aldy. Endi meni sot kútip tur», - dedi naýbaıhanashy.
Sot Kaznavqa aptasyna 6 kún jumys isteý týraly sheshim shyǵardy, endi onyń naýbaıhanasy dúısenbi saıyn jabyq bolady. Onyń aıtýyna qaraǵanda, ol 250 myń eýro shyǵynǵa batady, sondaı-aq birneshe qyzmetkerlerdi jumystan shyǵarýǵa májbúr bolyp otyr. «Men qatty tańǵaldym, biraq bul zań, odan asa almaımyz», - dep kúıindi ol.
Aıta keteıik, Frantsııada aptasyna 7 kún jumys isteýge tek belgili bir mekemelerge (qonaqúı, órt sóndirý qyzmeti, BAQ) ǵana ruqsat berý týraly zań ǵasyrdan astam ýaqyt buryn qabyldanǵan bolatyn.
