NATO ushaqtary demalys kúnderi 300 ret ushyp, Lıvııa armııasynyń 60 shaqty tehnıkasyn joıdy

Bul týraly Alıanstyń Brıýsseldegi shtab-páterinde ótken baspasóz máslıhatynda NATO Bas hatshysy Anders Fog Rasmýssen málim etti.

Onyń aıtýynsha, Lıvııadaǵy zorlyq-zombylyqty toqtatý úshin, NATO M.Kaddafıdiń rejımine qysym kórsetýdi jalǵastyrýda. «Senbi kúni tańerteńnen bastap NATO ushaqtary 300-deı ushý saparyn jasady. Biz 49 tankini, 9 saýytty tehnıkany, 3 zenıttik qarý men qarý-jaraq saqtalǵan 4 úlken býnkerdi joıdyq. Soqqylardyń kóbisi Mısrata jáne Adjdabııa tóńireginde jasaldy», - dedi A. Rasmýssen.

Deıturǵanmen, Alıans bas hatshysy, Lıvııadaǵy daǵdarysty tek áskerı jolmen sheshý múmkin emes ekenin atap kórsetti. «Beıbit halyqqa qatysty zorlyq-zombylyqty toqtatýǵa baǵyttalǵan halyqaralyq taraptyń kez kelgen áreketin NATO qoldaıdy», - atap kórsetti ol.

Onyń aıtýynsha, NATO men onyń seriktesteri Lıvııa daǵdarysyn sheshý jónindegi kúrdeli mıssııany óz moınyna alyp otyr. «Bul álemdik qoǵamdastyqtyń kúsh-jigerine qosqan bizdiń úlesimiz. Osy sársenbi kúni Katarda ótetin arnaıy toptyń otyrysyn asyǵa kútýdemin jáne osynaý basqosý daǵdarysty retteýdiń halyqaralyq negizin qamtamasyz etedi dep oılaımyn», dedi Alıans bas hatshysy.