NATO Trampty Reseıge qarsy sanktsııany álsiretý sheshimin qaıta qaraýǵa shaqyrdy
ASTANA. KAZINFORM – Frıdrıh Merts, Mark Karnı jáne Norvegııa basshylyǵy Donald Trampty Reseı munaıyna qatysty sanktsııalardy ýaqytsha toqtatý týraly sheshimin qaıta qaraýǵa aqyrdy. Euronews-ke bergen pikirinde Germanııanyń qorǵanys mınıstri Borıs Pıstorıýs bul qadamnyń Ýkraınaǵa tıgizer yqtımal áserine alańdaýshylyq bildirdi.
Germanııa kantsleri Frıdrıh Merts juma kúni málimdegendeı, G7 elderiniń jeteýiniń altaýy AQSh-tyń Reseı munaıyna qatysty sanktsııalardy ýaqytsha álsiretý týraly sheshimine qarsy shyqqan. AQSh prezıdenti Donald Tramp bul qadamǵa álemdik naryqtaǵy usynysty arttyrý maqsatynda barǵan. Mundaı jaǵdaı AQSh pen Izraıldiń Iranǵa qarsy 28 aqpanda bastalǵan áskerı is-qımyldary saldarynan munaı baǵasynyń kúrt ósýinen keıin boldy.
NATO quramyna kiretin Kanada, Germanııa jáne Norvegııa basshylary Aq úımen baılanys arnalary arqyly Trampty bul sheshimnen bas tartýǵa kóndirýge tyrysatynyn málimdedi.
Úsh el alıanstyń ustanymyn taǵy da rastady: Ýkraınadaǵy soǵysqa jáne jahandyq qaýipsizdikke tóngen keń aýqymdy qaterge baılanysty Kremlge barynsha qysym kórsetý jalǵasýy tıis.
— Jeteýdiń altaýy Reseıge qarsy sanktsııalardy alyp tastamaýymyz kerek degen pikirdi anyq bildirdi, – dedi Merts.
— Búgin tańerteń AQSh úkimetiniń basqa sheshim qabyldaǵanyn estigende biz biraz tańǵaldyq, – dedi kantsler Norvegııada ótken baspasóz konferentsııasynda.
Kóshbasshylar Reseıdiń Ýkraınaǵa qarsy keń aýqymdy basqynshylyǵyna baılanysty Kremlge qysymdy barynsha kúsheıtý qajet degen ortaq pikirge keldi. Sondaı-aq olar Reseıdiń álemdik munaı naryǵyna qaıta oralýynan paıda kórmeýi kerek ekenin aıtty.
— Bul sheshim durys emes, óıtkeni odan Reseı paıda kóredi, – dep atap ótti Merts.
— Bul sumdyq soǵysty múmkindiginshe tezirek toqtatý úshin Reseıge qysymdy kúsheıtýimiz kerek. Sondyqtan keshe keshke Vashıngtonda qabyldanǵan sheshimge biz basqasha qaraımyz, – dedi ol.
Baspasóz máslıhatynda G7 nemese NATO elderi Tramptan bul sheshimdi qaıta qaraýdy suraı ma degen suraqqa Kanada premer-mınıstri Mark Karnı:
— Bárimizdiń AQSh prezıdentimen tikeleı baılanys arnalarymyz bar jáne biz olardy paıdalanamyz, – dep jaýap berdi.
Óz kezeginde Merts Emmanýel Makronmen sóılesip, Tramptyń josparyn aınalyp ótýdiń joldaryn qarastyrý múmkindigin talqylaıtynyn aıtty.
— Demalys kúnderi bir-birimizben sóılesýge múmkindik bolady. Ne isteýge bolatynyn qaraımyz, – dedi ol.
Aıta keteıik, Tramp reseılik munaıǵa salynǵan sanktsııalardy ýaqytsha jeńildetti. Buǵan deıin AQSh Reseı munaıyna qatysty sanktsııalardy jumsartýdy qarastyryp jatqanyn jazdyq.
