NATO shabýylynyń saldarynan M.Kaddafıdiń uly men úsh nemeresi opat boldy
ASTANA. 1 mamyr. QazAqparat - Mýammar Kaddafıdiń kishi uly - 29 jastaǵy Saıf ál-Arab, sondaı-aq Lıvııa basshysynyń úsh nemeresi onyń rezıdentsııasyna jasalǵan NATO áýe shabýylynyń saldarynan qaza tapty.
Bul týraly Lıvııa úkimetiniń baspasóz hatshysy Mussa Ibragım málim etti, dep habarlaıdy RBK agenttigi.
Áýe shabýyly kezinde úıde Mýammar Kaddafıdiń ózi de bolǵan, biraq ol zardap shekpegen. M.Ibragımniń aıtýynsha, jaralanǵandardyń qatarynda M.Kaddafıdiń otbasynyń birneshe dostary men týystary bar.
NATO ókilderi buǵan qatysty ázirge eshqandaı túsindirme bergen joq.
«Operatsııanyń maqsaty memleket basshysynyń kózin joıý bolǵan. Kórip otyrǵanymyz - djýnglıdiń zańy. Lıvııada bolyp jatqan oqıǵalardyń azamattyq tulǵalardy qorǵýmen eshqandaı qatysy joq ekeni jurttyń bári túsinip otyr», - dep málim etti M.Ibragım jýrnalısterge.
