NATO-nyń jańa bas hatshysy qyzmetine Norvegııanyń burynǵy Úkimet basshysy keledi
ASTANA. QazAqparat - Norvegııanyń burynǵy premer-mınıstri Iens Stoltenberg NATO-nyń jańa bas hatshysy bolady.
Onyń kandıdatýrasyn Alıansqa qatysýshy elderdiń barlyǵy qoldady,- dep habarlady Reıter agenttigi dıplomatııalyq toptaǵy derekkózine silteme jasap.
Aıta keteıik, qazirgi ýaqytta atalǵan uıymdy Anders Fog Rasmýssen basqarady. Ol bul qyzmetke 2009 jyldyń sáýirinde NATO sammıtinen keıin kirisken bolatyn. Onyń ókilettigi aǵymdaǵy jyldyń 30 qyrkúıeginde aıaqtalmaq.
Jańa bas hatshynyń kandıdatýrasy alıansqa múshe memleketter tarapynan qoldaý tabýy tıis. Kelisimge qol jetkizilgennen keıin ol NATO-da kem degende múshe memleketterdiń turaqty ókilderi deńgeıinde resmı tirkelýi qajet. Dál osy másele jan-jaqty talqyǵa túsýi múmkin. Eske sala ketsek, alıans elderi qorǵanys mınıstrlikteri basshylarynyń kezdesýi Brıýsselde 1-2 sáýir kúnderi ótedi.
