NATO-nyń áskerı operatsııasy kezindegi Qazaqstannyń Lıvııadaǵy elshiliginiń jumysy eldegi jaǵdaıǵa baılanysty bolmaq - QR SІM
ASTANA. 19 naýryz. QazAqparat /Damır Baımanov/ - NATO-nyń áskerı operatsııasy kezindegi Qazaqstannyń Lıvııadaǵy elshiliginiń jumysy ol eldegi jaǵdaıdyń qalaı qalyptasatynyna baılanysty bolmaq,
dep habarlady QR Syrtqy ister mınıstrliginiń resmı ókili Asqar Ábdrahmanov QazAqparat tilshisine bergen suhbatynda.
«Qazaqstannyń Lıvııadaǵy elshiligi qazirgi tańda qalypty rejımde jumys isteýde. NATO-nyń áskerı operatsııalary kezindegi bizdiń dıplomatııalyq mıssııamyzdyń jumysy qalyptasatyn jaǵdaıǵa baılanysty bolady», deıdi ol.
Juma kúni CNN telekompanııasy Pentagondaǵy joǵary laýazymdy resmı tulǵalarǵa silteme jasap, BUU Qaýipsizdik keńesiniń qararymen sanktsııalanǵan Lıvııanyń áýe keńistigin jabý jónindegi operatsııanyń jeksenbi nemese dúısenbi kúni júzege asyrylýy múmkin ekenin habarlaǵan bolatyn. Obama ákimshiligi Lıvııanyń áýe keńistigin jabýdyń josparyn ázirlep otyr, odaqtastardyń ushaqtary jeksenbi nemese dúısenbi kúnderi Lıvııa aspanyn torýyldaýǵa shyǵýy múmkin.
Al amerıkandyq BAQ-tarǵa silteme jasap Interfaks agenttiginiń habarlaýynsha, AQSh Memlekettik hatshysy Hılları Klınton Týnıste sóılegen sózinde, Lıvııa aspanyn jabý operatsııalarynyń barysynda «eldiń qorǵanys júıesiniń nysanalary bombylanatynyn» aıtqan.
