NATO Norvegııadaǵy oqıǵa úshin Túrkııa prezıdentinen keshirim surady
ASTANA. QazAqparat -Túrkııa prezıdenti Rejep Taııp Erdoǵanmen telefon arqyly sóılesken NATO-nyń bas hatshysy Iens Stoltenberg Norvegııada NATO-nyń oqý-jattyǵýy kezinde bolǵan jaǵdaı úshin resmı túrde keshirip surady. Bul týraly Túrkııa basshysynyń ákimshiligine silteme jasap Anadoly agenttigi habarlady.
NATO Bas hatshysynyń aıtýynsha, bolǵan jáıt jan-jaqty tekserilýde. Al oǵan qatysy bar kelisimshart boıynsha tehnıkalyq jumysshy dereý jumystan qýyldy.
Stoltenberg Túrkııa NATO-nyń mańyzdy seriktesi bolyp tabylatynyn atap ótti.
«Keleshekte mundaı oqıǵalardy boldyrmas úshin barlyq qajetti sharalar qolǵa alynatyn bolady. Bolǵan daý-damaı Soltústikatlantıkalyq alıanstyń Ankaramen odan arǵy qarym-qatynasyna áser etpeıdi degen úmittemin», - dedi NATO bas hatshysy.
Aıta keteıik, 8-17 qarasha kúnderi aralyǵynda Norvegııada NATO-nyń «Úsh ashaly naıza» («Trident Javelin») ataýymen oqý-jattyǵýy ótti. Onyń uıymdastyrýshylary Alıanstyń shartty qarsylastary kórsetilgen stend ilgen. Olardyń arasynda Túrkııa Respýblıkasynyń negizin qalaýshy Mustafa Kemal Atatúrik pen Rejep Taııp Erdoǵan da bolǵan. Ony kórgen túrik áskerıleri oqý-jattyǵýdan qatysýǵa bas tartqan.
Norvegııanyń qorǵanys mınıstrligi men NATO-nyń bas hatshysy Túrkııa prezıdentinen buǵan deıin de keshirim suraǵan bolatyn.
