NATO-nyń bas hatshysy Túrkııaǵa barady

ASTANA. KAZINFORM — 13 mamyr kúni NATO-nyń bas hatshysy Mark Rıýtte Túrkııaǵa saparyn bastaıdy. Ol 14-15 mamyr kúnderi Antalıada ótetin NATO syrtqy ister mınıstrleriniń beıresmı kezdesýiniń qarsańynda Ankaraǵa barady, dep habarlaıdy Kazinform agenttiginiń menshikti tilshisi. 

Kútilip otyrǵandaı, NATO bas hatshysy Ankarada Túrkııa prezıdenti Rejep Taıyp Erdoǵanmen kezdesedi.

NATO-ǵa múshe memleketterdiń syrtqy ister mınıstrleriniń beıresmı kezdesýi – 24-26 maýsym kúnderi Nıderlandynyń Gaaga qalasynda ótetin Alıans sammıtiniń aldyndaǵy sońǵy is-sharalardyń biri.

Qazirgi kezeńde Eýropa elderi qorǵanysty kúsheıtip jatyr: NATO-ǵa múshe 22 memleket JІÓ-niń 2 paıyzyna teń qarjylandyrý maqsattaryna jetti. NATO bas hatshysy álemdegi eń iri áskerı alıansqa múshe 32 memleketti kóbirek qarajat bólip, jabdyq jáne saıası kúsh salýǵa shaqyrdy. Sebebi, AQSh Eýropadaǵy qaýipsizdik salasyndaǵy jetekshi rólinen birtindep bas tartyp jatyr.

Buǵan deıin, sáýir aıynda, NATO bas hatshysy Japonııa men AQSh-qa resmı saparmen barǵan bolatyn.