NATO múshe-elderiniń qorǵanys mınıstrleri Alıanstyń Aýǵanstandaǵy jańa jaýyngerlik emes mıssııasyn josparlaý úderisin talqylaıdy
BRıÝSSELЬ. 4 maýsym. QazAqparat - Brıýsselde NATO-nyń 28 múshe memleketteriniń jáne Alıanstyń Aýǵanstandaǵy qaýipsizdikke járdemdesý halyqaralyq kúshterine qatysýshy 22 áriptes-elderiniń qorǵanys mınıstrleri 2014 jyldan keıin bastalatyn AIR-daǵy jańa jaýyngerlik emes mıssııasyn josparlaý úderisin talqylaıdy.
Bul týraly NATO elderi qorǵanys mınıstrleriniń ekikúndik kezdesýi qarsańynda Alıanstyń bas hatshysy Anders Fog Rasmýssen málim etti.
«Kezdesý barysynda qazirgi mıssııanyń barysy, atap aıtqanda, qaýipsizdikke jaýapkershilikti aýǵan ókimet oryndaryna berý, sondaı-aq 2014 jyldan keıin aýǵandyq qaýipsizdik kúshterin oqytý, olarǵa keńes berý jáne kómek kórsetý jónindegi jańa mıssııany josparlaý máseleleri talqylanbaq», - dedi A.Rasmýssen.
Birqatar batystyq BAQ NATO qorǵanys mınıstrleri Aýǵanstandaǵy jaýyngerlik emes Blok mıssııasynyń bolashaq quramyn qaraıdy dep habarlady. Sonyń ishinde áýelde 8-12 myń áskerı qyzmetshi bolýy kózdelgen kontıngentti 13-14 myńǵa deıin kóbeıtý máselesi de kóteriletin bolady.
Buǵan jaýap retinde A.Rasmýssen «2014 jyldan keıin kúshter men ınspektorlardyń dál sany týraly sheshim qabyldanady dep kútpeımin», degendi aıtty. Alaıda olardyń sanyn kóbeıtý máselesin de joqqa shyǵarmady.
