NATO Iraktaǵy mıssııaǵa qatysqan barlyq personaldy Eýropaǵa evakýatsııalady
ASTANA. KAZINFORM — NATO Iraktaǵy mıssııasynyń qurylymyn ózgertti (NMI) jáne eldegi barlyq personaldy Eýropaǵa shyǵardy, dep habarlaıdy Anadoly.
NATO-nyń jazbasha habarlamasynda Iraktaǵy sońǵy NMI personaly 20 naýryzda elden shyqqany aıtylǵan.
Habarlamada NATO-nyń Eýropadaǵy Birikken kúshterdiń Joǵarǵy bas qolbasshysy (SACEUR) general Alekseı Grınkevıchtiń sózderi keltirilgen.
— Men Irak Respýblıkasyna jáne barlyq odaqtastarǵa NATO personalyn Iraktan qaýipsiz evakýatsııalaýdy qamtamasyz etýge kórsetken qoldaýlary úshin alǵys aıtamyn, — delingen habarlamada.
Onyń aıtýynsha, NMI mıssııasy Italııadaǵy Neapol qalasyndaǵy Birikken kúshter komandalyǵy arqyly jalǵastyrylady.
NMI soǵys mindetterin oryndamaıdy jáne Irakqa qaýipsizdik kúshteri men ınstıtýttaryn turaqty, ashyq jáne ınklıýzıvti etýge qoldaý kórsetýge baǵyttalǵan.
Mıssııanyń maqsaty — Irakqa óziniń qaýipsizdigin qamtamasyz etýge, terrorızmmen kúresýge jáne DAISh terrorıstik uıymynyń (DAISh – Qazaqstanda tyıym salynǵan uıym) qaıta paıda bolýyna jol bermeýge kómektesý.
Osyǵan deıin habarlanǵandaı, Taıaý Shyǵys aımaǵynan Qazaqstan azamattaryn evakýatsııalaý aıaqtaldy.
Budan bólek, eki aptada Ózbekstan Taıaý Shyǵys elderinen 33 myńǵa jýyq otandasyn evakýatsııalaǵany belgili boldy.
Sonymen qatar, 10 myńnan asa qytaılyq týrıst Birikken Arab Ámirlikteri (OAE), Oman, Saýd Arabııasy jáne basqa elderden aman-esen oraldy.
