NATO Eýropadaǵy jańa «jeńis strategııasyn» jarııalady
ASTANA. KAZINFORM – NATO-nyń Eýropadaǵy birikken qarýly kúshteriniń joǵarǵy bas qolbasshysy Aleksýs Grınkevıch alıanstyń shabýyldardy toıtarýǵa baǵyttalǵan jańa «jeńis teorııasyn» tanystyrdy, dep habarlaıdy Anadolu.
General bul týraly 2026 jylǵy Varshava qaýipsizdik forýmynda málimdedi. Onyń aıtýynsha, jańa tujyrymdama kez kelgen shabýyldy toqtatýdy, onyń saldaryn beıtaraptandyrýdy jáne agressııa jalǵasqan jaǵdaıda qarsylastyń shabýyldaýshy kúshterin isten shyǵarýdy kózdeıdi.
Grınkevıch NATO-nyń basty maqsaty beıbitshilikti saqtaý ekenin atap ótti.
– NATO – qorǵanys alıansy. Bizdiń halyqtarymyz ben aýmaqtarymyzdy qorǵaýdan basqa josparymyz da, maqsatymyz da joq. Alaıda qorǵanysqa basymdyq berýimizdi álsizdik nemese batyldyqtyń joqtyǵy dep qabyldaýǵa bolmaıdy, – dedi ol.
Bas qolbasshynyń aıtýynsha, alıansqa múshe 32 memleket ortaq «jeńis teorııasyn» qabyldaǵan. NATO qazirgi ýaqytta jaqyn bolashaqta áskerı qaqtyǵys bolady dep kútpeıdi, degenmen kez kelgen jaǵdaıǵa daıyn bolýdy mańyzdy sanaıdy.
– Qaqtyǵystardyń aldyn alý úshin soǵysqa daıyn bolý qajet. Al daıyndyq tek yqtımal oqıǵalarǵa ǵana emes, júzege asýy múmkin túrli stsenarıılerge de jospar qurýdy talap etedi, – dedi Grınkevıch.
Ol NATO-nyń barlaý múmkindikterine de toqtaldy. Generaldyń sózinshe, alıans ártúrli derekkózderden alynǵan aqparatty zamanaýı barlaý júıeleri men algorıtmder arqyly taldap, strategııalyq jáne jedel jaǵdaıdy turaqty baqylap otyrady.
– Bul alıanstyń kútpegen shabýylǵa tap bolý yqtımaldyǵy tómen ekenin bildiredi, – dedi ol.
Grınkevıch jańa tujyrymdamanyń úsh negizgi kezeńin túsindirdi. Aldymen NATO shabýyldy toqtatýǵa tyrysady. Eger shabýyl jalǵassa, onyń saldaryn beıtaraptandyryp, qarsylastyń ilgerileýine jol bermeıdi. Qajet bolǵan jaǵdaıda shabýylǵa qatysqan áskerı kúshter men jaýyngerlik júıelerdi isten shyǵarady.
Onyń aıtýynsha, alıans qarsylasyn strategııalyq turǵydan tolyq jeńýdi maqsat etpeıdi.
– Bizdiń maqsatymyz – kez kelgen shabýyldy toqtatý jáne qarsylastyń aýmaǵymyzdy basyp alyp, baqylaýda ustaýyna jol bermeý. Ol úshin bizge qarsy qoldanylǵan kúshterdi taktıkalyq jáne jedel deńgeıde jeńý jetkilikti. Biz shabýyl jasap jatqan jaýyngerlik júıeni odan ári áreket ete almaıtyndaı etip beıtaraptandyramyz, – dedi general.
Ol NATO shıelenisti ýshyqtyrýdy kózdemeıtinin, al qaqtyǵys órshigen jaǵdaıda jaýapkershilik shabýyl jasaǵan tarapqa júkteletinin málimdedi.
Grınkevıch alıans jańa tujyrymdamany iske asyrý úshin áskerı daıyndyqty kúsheıtip jatqanyn jetkizdi.
– Eger bizge shabýyl jasalsa, búgin túnniń ózinde soǵysýǵa daıynbyz. Biraq buǵan toqmeıilsimeımiz. Kún saıyn daıyndalyp, áskerı jattyǵýlar ótkize beremiz. Erteń búgingiden, al búrsigúni erteńgiden de daıyn bolamyz, – dedi ol.
Sóziniń sońynda general NATO-nyń basty mindeti beıbitshilikti qorǵaý ekenin taǵy da atap ótti.
– Búgin tanystyrǵan jeńis teorııasy meni eshqashan bergim kelmeıtin buıryqtardy berýge májbúr etýi múmkin. Alaıda soǵys bastalsa, biz shabýyldy toqtatyp, onyń saldaryn beıtaraptandyramyz. Al agressııa jalǵassa, shabýyl jasaýshy kúshterdi isten shyǵaramyz, – dep túıindedi Aleksýs Grınkevıch.
Aıta keteıik, buǵan deıin Brıýsselde NATO elderiniń Bas shtab bastyqtary bas qosyp, alıanstyń qorǵanys áleýeti men qarsylasty tejeý tetikterin talqylaǵan bolatyn.
