NATO elderi qorǵanys shyǵyndaryn JІÓ-niń 5%-yna deıin ulǵaıtýǵa kelisti
ASTANA.KAZINFORM - Osy aptada NATO odaqtastary JІÓ-niń shamamen 3,5%-yn tikeleı qorǵanysqa jáne taǵy 1,5%-yn osyǵan baılanysty ınvestıtsııalarǵa jumsaýǵa mindettenedi, dep habarlaıdy Euronews.
NATO-daǵy odaqtastar qorǵanys shyǵyndaryn 2035 jylǵa qaraı ishki jalpy ónimniń 5 paıyzyna deıin ulǵaıtýǵa kelisti.
Alıanstyń barlyq 32 múshesiniń ókilderi Gaagadaǵy sammıt qarsańynda jańa mindettemege qol qoıdy. Qujat 25 maýsymda resmı túrde qabyldanady dep josparlanǵan.
Odaqtastar JІÓ-niń 3,5 paıyzyn tikeleı qorǵanysqa, taǵy 1,5 paıyzyn qorǵanysqa baılanysty ınvestıtsııalarǵa, sonyń ishinde kıberqaýipsizdik pen áskerı shyǵyndarǵa jumsamaqshy.
AQSh prezıdenti Donald Tramp NATO elderi ishki jalpy ónimniń 5 paıyzyn qorǵanysqa jumsaıtynyn kópten beri aıtyp keledi. Alaıda ótken aptada ol AQSh-tan mundaı maqsatqa jetýdi talap etpeý kerektigin aıtty. Qazirgi ýaqytta AQSh qorǵanys salasyna ishki jalpy ónimniń 3,2-3,4 paıyzyn jumsaıdy.
Alıans Ispanııadaǵy jaǵdaıdy eskere otyryp, erejeden erekshelik jasaıdy dep habarlaıdy. Ótken aıda Ispanııa premer-mınıstri Pedro Sanches NATO-nyń bas hatshysy Mark Rıýttege hat joldap, Madrıd qorǵanysqa ishki jalpy ónimniń 5 paıyzyn jumsaı almaıtynyn aıtty.
NATO sammıti qarsańynda Gaagada narazylyq aktsııasy ótti. Oǵan bes myńǵa jýyq demonstranttar — solshyl belsendiler, patsıfıster jáne ıran dıasporasynyń ókilderi qatysty. Olar Gazadaǵy soǵysqa qarsy shyǵyp, Izraıl men AQSh-tyń Iranǵa qarsy áreketterin aıyptady. Sherýshiler «Soǵysqa jol joq!» uranymen urandy.
— Biz soǵysqa qarsymyz. Adamdar beıbit ómir súrgisi keledi. Qorshaǵan ortanyń jaǵdaıyna qarańyzshy. Bári bitti. Sonda biz soǵysqa ne úshin aqsha jumsaımyz, — deıdi Gollandııada turatyn ırandyq 74 jastaǵy Hosseın Hamadanı.
Qazirgi ýaqytta NATO elderiniń kópshiligi qorǵanysqa ishki jalpy ónimniń 2 paıyzdan astamyn jumsaıdy.
Gaagadaǵy NATO sammıti kúsheıtilgen qaýipsizdik jaǵdaıynda ótedi. Tártipti qamtamasyz etýge myńdaǵan sarbaz ben polıtsııa qyzmetkerleri, sondaı-aq kıberqaýipsizdik mamandary jumyldyrylǵan (kod ataýy «Orange Shield» operatsııasy).
Buǵan deıin Ońtústik Koreıa prezıdenti NATO sammıtine qatysýdan bas tartqany habarlanǵan bolatyn.