«NATO-da Qazaqstanǵa oryn bar ma» - respýblıkalyq basylymdarǵa sholý

** *

«Kóp áıel alýshylyq jáne ony zańdastyrý máselesi Parlament depýtattary tarapynan aragidik sóz bolyp kele jatqany barshamyzǵa málim. Qoǵamda da biraz jyldan beri qozǵalyp kele jatqan eki áıel alýdy zańdastyrý máselesi sársenbiniń sátti kúni sheshimin tapty», dep jazady «Alash aınasy» gazeti beısenbilik sanynda jaryq kórgen «Kóp áıel alý zańmen bekitildi» atty maqalasynda.

Qoldap daýys bergen depýtattardyń aıtýynsha, sońǵy sanaq elimizde demografııalyq jarylystyń joq ekenin kórsetip berdi. «Sonymen qatar, qazir otyryp qalǵan qyzdardyń sany jyl ótken saıyn artýda. Sondyqtan qyzdarymyzdyń oń jaqta otyryp qalmaı, turmys qurýy, demografııalyq jaǵdaıdy jaqsartý úshin osyndaı qadamǵa bardyq» deıdi halyq qalaýlylary. Jalpy bul zań jobasyn bizdiń memleket qana qabyldap otyrǵan joq.

Oral qalasynyń tótenshe jaǵdaılar basqarmasy shahardy tasqyn sýdan saqtandyrý maqsatynda táýlik boıy qyzmetke kóshkenine biraz ýaqyt boldy. Osy tótenshe jaǵdaı arqaý bolǵan maqalany keńinen oqyǵyńyz kelse, «Alash aınasy» gazetinde «Oral sý ishindegi aralǵa aınalyp júrmesin!..» degen taqyryppen berilgen maqalaǵa nazar salyńyz. Basylymnyń habarlaýynsha, Oral qalasynyń ońtústik-batys, soltústik-shyǵys jáne ońtústik bóliginde jaǵdaı máz emes. Zashaǵan kentine qarasty «qazaq aýyldary» atanǵan «Keńdala», «Kóktem», «Arman», «Sary taý» shaǵynaýdandary, №10 orta mektep aımaǵy, Derkól, Jelaev, Krýgloozernyı kentterindegi jáne qala ortalyǵyndaǵy keıbir kóshelerdi sý basqan.

«Parlament Májilisiniń depýtaty Aldan Smaıyl Vladımır Bojkonyń mınıstrligin «uıqydaǵy uıymǵa kóbirek uqsaıdy» dep aşy aıyptady. «Uıqydaǵy arý» degen ertegige teńegendeı bolyp...», dep jazady «Alash aınasy» gazeti.

Buǵan mınıstrliktiń Shyǵys Qazaqstan oblysyn qys boıy qar jamylyp, kóktemniń qaterli bolatynyn bile tura erterek dabyl qaqpaýy, kesh qımyldaýy dálel. Atalǵan mınıstrliktiń salǵyrttyǵynan tutas óńirler, respýblıka qyrýar materıaldyq jáne moraldyq shyǵynǵa ushyraýda. Bul oraıda halyq qalaýlysy «aýa raıy qubylmaly, jer kólemi ushan-teńiz Qazaqstan sekildi keń baıtaq respýblıkaǵa jedel qımyldaıtyn mınıstrlik, ushqyr oılaıtyn mınıstr kerek», dep túıindepti óz sózin. Basylymnyń jazýynsha, A.Smaıyl buǵan ǵana emes, Aýyl sharýashylyǵy mınıstrligine de ókpeli eken.

Osydan týra bir jyl buryn, ıaǵnı 1 sáýirde NATO quramyna Albanııa men Horvatııa enip, alyp uıym óz tarıhynda altynshy márte keńeıgen bolatyn. Qulashyn keńge jaıǵan NATO kóbinese turaqsyz elderdi emes, saıası ahýaly bir qalypty elderdi óz qataryna qosýda. Osyǵan oraı «Alash aınasy» gazeti «NATO-da Qazaqstanǵa oryn bar ma» degen taqyryppen maqala jarııalady. «Іshki saıası alaýyzdyq Ýkraına men Gúrjistannyń NATO-dan esek dámesin úzgeni málim. Talaı márte Qazaqstannan janjaldy aımaqtarǵa bitimgershilik kúshterin jiberýdi ótinip júrgen soltústikatlantıkalyq odaqtyń kókeıinde Ortalyq Azııadaǵy Qazaqstannyń esebinen irgesin jetinshi márte keńeıtý múddesi menmundalap turǵany anyq», dep jazady basylym.

***

«Aıqyn» gazetiniń beısenbilik nómirinde «Joǵary partııa mektebi ashylady» degen taqyryppen maqala jaryq kórdi. Basylymnyń jazýynsha, qazirgi ýaqytta «Nur Otan» partııasynyń Joǵary partııalyq mektebin qurý boıynsha uıymdastyrý-tehnıkalyq jumystary jasalý ústinde eken. Mektep eldiń partııalyq-saıası elıtasyn qalyptasyrý ortalyǵyna aınalmaq. Bul týraly «Nur Otan» HDP tóraǵasynyń birinshi orynbasary Nurlan Nyǵmatýllın keshe Almatyda ótken partııanyń qalalyq fılıaly bastaýysh uıymdary forýmynda málimdegen.

«Parlament senatynyń Tóraǵasy Qasym-Jomart Toqaev Slovakııa Respýblıkasynyń Prezıdenti Ivan Gashparovıchpen kezdesti», dep jazady «Aıqyn» gazeti. Bsylymnyń habarlaýynsha, joǵary mártebeli meımanmen kezdesý barysynda Q.Toqaev Qazaqstan Slovakııany Eýropalyq odaqtaǵy mańyzdy saıası ári ekonomıkalyq áriptesi retinde qarastyratyndyǵyn jáne barlyq salalar men deıńgeılerdegi dıalogty damytýǵa múddeli ekendigin atap ótken. Sonymen qatar Slovakııaǵa Qazaqstannyń EQYU tóraǵalyǵyna jáne Uıymnyń sammıtin ótkizýge qatysty qazaqstandyq bastamaǵa kórsetken qoldaýlary úshin shynaıy alǵysyn bildirgen.

Jýyrda elimizdiń bir top jekpe-jek sheberleri AQSh-qa baryp, bir aıdan astam ýaqyt boıy oqý-jattyǵý jıynyn ótkizip qaıtqan bolatyn. Sol sapar aıasynda AQSh pen Qazaqstan qurama komandalary arasynda matchtyq kezdesý de uıymdastyrylyp, 4:2 esebimen jerlesterimiz basym túsken edi. Osy sportshylardyń arasynda bolǵan erejesiz jekpe-jekten álemniń úsh dúrkin chempıon Ardaq Nazarovpen aradaǵy suhbat «Aıqyn» gazetinde «Amerıkada atoı salýdy armandaımyn» degen taqyryppen berilgen. A.Nazarovtyń úlken sporttaǵy jetistikteri, alańda ótkizgen jekpe-jekteri, alǵa qoıǵan maqsattary jaıynda keńinen bilgińiz kelse, basylymda jarııalanǵan suhbatqa nazar salyńyz.

***

«Aqordada Elbasy Nursultan Nazarbaev Slovakııa Prezıdenti Ivan Gashparovıchpen kezdesti», dep jazady «Astana aqshamy» gazeti. Basylymnyń atap ótýinshe, mártebeli meımannyń elimizge memlekettik sapary barysynda qazaqstandyq-slovakııalyq saýda-ekonomıklyq jáne mádenı-gýmanıtarlyq yntymaqtastyqty keńeıtý jaıy jan-jaqty talqylanǵan. Kezdesý barysynda Memleket basshysy N.Nazarbaev elde qolǵa alynǵan jedel ındýstrııalyq-ınnovatsııalyq damý baǵdarlamasy týraly áńgimelep, Slovakııa kásipkerlerin 20 mıllıard dollar bólinetin, bas-aıaǵy 176 jańa nysan salýdy kózdeıtin keshendi bastama aıasynda yntymaqqa shaqyrǵan.

Osy mańyzdy kezdesý jaıynda «Ekonomıka» basylymy da tarqata jazǵan. Gazet betinde jarııalanǵan maqalada «Biz aldaǵy eki jylda Qytaı Halyq Respýblıkasymen jalǵastyratyn temir jol jelisin salyp bitirmekpiz. Bul Shyǵysty biz arqyly Iranmen jalǵastyryp, Parsy shyǵanaǵyna qosatyn, Kaspıı jaǵasyndaǵy teńiz aılaqtarymen jalǵaıtyn ekinshi bolat jol bolmaq. Men Slovakııa bıznesin osy jobalarǵa belsene qatysýǵa shaqyramyn. Óıtkeni, bizdiń ekonomıkamyz barynsha ashyq, salyq júıesinde jeńildikter qarastyrylǵandyqtan, bızneske qajetti jaǵdaıdyń bári jasalǵan», degen sózi keltirilgen.

«Astana aqshamy» gazetiniń jazýynsha, talaı talantty jastyń úmitin úkilegen respýblıkalyq «Jas qanat» baıqaýy sáýirdiń 16-18-i kúnderi elordanyń Kongress-Holl saraıynda ótpek. Osymen 19-shi ret shymyldyǵyn ashatyn baıqaýǵa Astana qalasynyń ákimdigi, «Habar» agenttigi jáne «Azııa daýysy» halyqaralyq festıvali qoldaý kórsetip otyr.

Sáýirdiń 1-i, kúlki kúnine oraı «Astana aqshamy» gazeti satırık-jazýshy Berik Sadyrmen aradaǵy ekeýara áńgimeni jarııalap otyr. Suhbat «Qazaq satırasy barlyq kezeńde bolǵan jáne bola da beredi» degen taqyryppen berilgen. Áńgime barysynda B.Sadyr «ókinishke qaraı, saıası taqyryptarǵa jazylatyn ázil-ospaq, syn-syqaq qazir joqtyń qasy deýge bolady. Bir kezderdegi feleton janrynyń qaı basylymnan bolsa da kórinbeı ketkeni ras. Óıtkeni bul jaýynger janr naqty derekterge qurylyp, mysqylmen synaı otyryp, ájýalaýdy maqsat tutatyndyqtan, kúrdeli ári kúrmeýi qıyndaý kúı keship qaldy», depti.

***

«Shyǵys Qazaqstan óńirine bıyl ońaı soqpaı tur. Alty aı qys bul aımaqtyń el-jurtyn qyspaqqa alyp edi, endi kúnniń kózi jyltyraǵaly sý tasqyny halyqtyń mazasyn aldy. Aımaqtaǵy Tarbaǵataı aýdanyna qarasty Kókjyra, Qyzyl kesek, Jantekeı jáne taǵy basqa birneshe aýyldy ózen-kólge qosylǵan qar sýy basyp qaldy. Keıbir málimetterge qaraǵanda, Shyǵys aımaqta kúni búginge deıin 35 myń mal qyrylypty. On myńǵa jýyq halyq basqa jaqqa kóshirildi. Júzdegen úı jaramsyz bop qaldy», dep jazady «Ekonomıka» gazeti. Maqalanyń egjeı-tegjeıin búgingi nómirden oqı alasyzdar.

***

«Kazahstanskaıa pravda» gazetiniń jazýynsha, Qazaqstan Astanada EQYU memleketteri basshylarynyń sammıtin ótkizýge Ýkraınanyń qoldaý bildiretindigine ýáde aldy. Bul týraly Ýkraına prezıdenti Vıktor ıAnýkovıch óz eline saparmen kelgen QR Memlekettik hatshysy - Syrtqy ister mınıstri, Uıymnyń Іs basyndaǵy tóraǵasy Qanat Saýdabaevpen bolǵan kezdesý barysynda málim etken. Sondaı-aq ol Ýkraınanyń 2013 jyly EQYU tóraǵalyǵyna kandıdatýrasyn Qazaqstannyń da qoldaý bildiretindigine senim artqan.