NATO Bas shtab bastyqtary Ýkraınadaǵy jaǵdaıdy talqylady

ASTANA. KAZINFORM — Brıýssel qalasynda NATO–Ýkraına keńesi formatynda NATO-ǵa múshe elderdiń bas shtab bastyqtarynyń otyrysy ótti, dep jazdy Anadoly agenttigi.

NATO Áskerı komıtetiniń tóraǵasy, admıral Djýzeppe Kavo Dragoneniń tóraǵalyǵymen ótip jatqan bul jıyn ekinshi kúnge jalǵasty.

Keńes barysynda Ýkraınadaǵy áskerı jaǵdaıdyń sońǵy ózgeristeri, Reseıdiń jýyrdaǵy áreketteri, sondaı-aq Kıev bıliginiń qazirgi qajettilikteri qarastyrylyp otyr. Sonymen qatar Ýkraınaǵa alıans elderi tarapynan kórsetilip jatqan qoldaýdy úılestirý máselelerine erekshe nazar aýdaryldy. Bul qatarǵa qarý-jaraq pen oq-dári jetkizý, áýe shabýylyna qarsy qorǵanys júıeleri, áskerı daıarlyq baǵdarlamalary jáne logıstıkalyq kómek kiredi.

Kún tártibinde sondaı-aq Ýkraına qarýly kúshteriniń áleýetin arttyrý, olardy NATO standarttaryna beıimdeý jáne alıanstyń qaýipsizdik salasyndaǵy uzaq merzimdi mindettemeleri talqylanǵan.

Otyrystyń ekinshi sessııasynda qatysýshylar Azııa–Tynyq muhıty óńirindegi seriktester — Avstralııa, Japonııa, Koreıa Respýblıkasy jáne Jańa Zelandııamen ózara is-qımyldyń jaı-kúıin talqylaıdy.

Kezdesý sońynda Grýzııadaǵy jaǵdaıdyń damýy da qaralady.

NATO elderiniń bas shtab bastyqtary alıanstyń áskerı kún tártibin talqylaý úshin jylyna keminde eki ret bas qosady. Ádette mundaı kezdesýlerdiń biri NATO-nyń Brıýsseldegi shtab-páterinde, al ekinshisi rotatsııalyq negizde múshe elderdiń birinde ótedi.

Qaýipsizdik jaǵdaıynyń damýyna baılanysty kezekten tys otyrystar da uıymdastyrylyp, olardyń aıasynda odaqtastar qorǵanys josparlaryn, tejeý saıasatyn jáne ózekti daǵdarystardy áskerı deńgeıde talqylaıdy.

Eske sala keteıik, buǵan deıin AQSh Kongresi «NATO birligin qorǵaý» týraly zań jobasyn daıyndady.