NATO bas hatshysy Mark Rıýtte áskerı bloktyń shtabyna qysqartý engizip jatyr
ASTANA. KAZINFORM — Soltústik Atlantıka alıansynyń (NATO) shtab-páterinde kadrlardy qysqartý josparlanyp otyr, dep habarlaıdy Kazinform tilshisi Eýropa basylymdaryna silteme jasap.
Politico basylymynyń deregine qaraǵanda, 2024 jylǵy qazan aıynda osy laýazymǵa kelgen Mark Rıýtte aýqymdy restrýktýrızatsııany qolǵa almaq. Ol Brıýsseldegi NATO shtabynyń quramynda eki bólimdi joıýdy jáne ondaǵan qyzmet oryndaryn qysqartýdy josparlap otyr.
Bul reorganızatsııa buǵan deıin resmı túrde habarlanbaǵan edi jáne ol AQSh prezıdenti Donald Tramptyń NATO-ǵa kúmánmen qaraýy jáne Amerıka Qurama Shtattarynyń alıanstan shyǵýy múmkin degen odaqtastar arasyndaǵy alańdaýshylyqtar aıasynda júzege asyp jatyr.
Reformalar sondaı-aq Ýkraına men Taıaý Shyǵystaǵy áskerı qaqtyǵystar aıasynda júrip jatyr. Buǵan qosa, Tramp ákimshiligi Eýropanyń qaýipsizdigine qatysty máselelerde AQSh-tyń shettetiletini nemese keıingi orynǵa yǵystyrylýy múmkin ekenin birneshe ret málimdegen.
Sońǵy aılarda Rıýtte qyzmetkerlerimen eki jıyn ótkizip, olarǵa NATO-nyń halyqaralyq bólimderi sany segizden altyǵa deıin qysqartylady dep jarııalady. Qysqartýǵa ushyraıtyn bólimder — NATO-nyń qoǵamdyq dıplomatııa bólimi (baspasóz qyzmeti) jáne atqarýshy jáne kadr bólimi. Bul bólimderdiń fýnktsııalary basqa bólimderge berilmek, al bas hatshy kómekshileri — bólim basshylarynyń laýazymy qysqartylmaq.
Brıýsseldegi shtab-páterde shamamen 4 000 adam, onyń ishinde 1 500 halyqaralyq qyzmetker jumys isteıdi.
Aldaǵy ýaqytta Gaagada ótetin Alıans sammıtinde Rıýtte Tramp pen basqa da odaqtastardyń aldynda NATO-ny tıimdi ári únemdi etý, sondaı-aq resýrstardy «uqypty paıdalaný» jónindegi josparlaryn tanystyrmaq. VUB ýnıversıtetiniń dotsenti ári Egmont ınstıtýtynyń sarapshysy Aleksandr Mattelaerdiń aıtýynsha, «Rıýtte shtab-páterdegi qosalqy personal qurylymyn basymdyqtarǵa saı qaıta quryp, qorǵanysqa qaıta ınvestıtsııa sala otyryp, qolda bar múmkindikterdi barynsha tıimdi paıdalanýǵa kúsh salýda».
Sarapshy qysqartýlar kezinde Rıýtte AQSh-pen «tyǵyz yntymaqtastyqty» saqtaǵanyn atap ótti.
— Qaıta uıymdastyrý protsesine qyzmetkerler de belsendi qatysyp jatyr, bul bastamaǵa odaqtastar tarapynan qoldaý kórsetilýde, — dedi NATO-nyń resmı ókilderiniń biri.
Buǵan deıin Rıýtte NATO Izraıldiń Iranǵa jasaǵan soqqysynan keıin álem ıadrolyq soǵysqa taıap qaldy dep sanamaıtynyn aıtqan edi.