NATO Bas hatshysy AQSh-tyń Alıansqa qatysty ustanymy týraly baıandady
ASTANA. KAZINFORM – Búgin Brıýsselde NATO Syrtqy ister mınıstrleriniń sammıti bastaldy. Baspasóz máslıhaty barysynda Alıanstyń bas hatshysy Mark Rıýtte belgilegendeı, AQSh-tyń álemdegi iri áskerı bloktardyń birine qatysý formatyn ózgertýge nıetti emes, dep habarlaıdy Kazinform menshikti tilshisi.
Ol prezıdent Donald Tramp basshylyǵy kezinde Amerıkanyń Eýropadan shyǵýyna qatysty alańdaýshylyqtyń artýyna jaýap retinde Qurama Shtattardyń Alıansqa beıildiligi sııaqty NATO da berik ekenin málimdedi.
— Amerıkalyqtar NATO-ǵa, 5-bapqa beıildiligin qaıta-qaıta málimdedi… Men bul alıanstiń AQSh-pen uzaq ýaqyt boıy qalatynyna tolyq senimdimin, — dedi ol Brıýsselde tilshilerge.
Mark Rıýtte qosyp ótkendeı, mindetteme «Atlant muhıtynyń osy jaǵynda jáne Kanadada qorǵanysqa kóbirek jumsaıdy dep kútetin» naqty úmitpen qatar kelip otyr.
Jergilikti BAQ-tyń jazýynsha, NATO-nyń maqsaty — qorǵanysqa ishki jalpy ónimniń kem degende 2 paıyzyn jumsaý, biraq Donald Tramp bul kórsetkishti 5 paıyzǵa deıin jetkizgisi keledi. Mark Rıýtte «3 paıyzdan aıtarlyqtaı kóp» týraly aıtty.
Bul másele alıanstyń syrtqy ister mınıstrleriniń beısenbi jáne juma kúnderi Brıýsselde ótetin otyrysynda kóteriletini atap ótildi.
Washington Post gazeti AQSh áskeri men qarý-jaraǵyn Eýropadan Úndi-Tynyq muhıty aımaǵyna kóshirýdi bastaý jospary týraly habarlady, al NBC News AQSh ákimshiligi Eýropadaǵy odaqtas kúshterdiń joǵarǵy qolbasshysy laýazymyn eýropalyq adamǵa tapsyrýy múmkin ekenin jazdy.
Mark Rıýtte AQSh áskerin Azııaǵa jiberý múmkindigine qatysty joǵaryda atalǵan jarııalanymdar boıynsha suraqtarǵa jaýap bergen joq.
— Men qaýesetten basqa eshteńe kórmedim. Bul másele boıynsha AQSh-tyń naqty usynystaryn kórgen joqpyn. Áskerdi shyǵarý nemese oǵan uqsas esh jospar joq. Biz AQSh-tyń NATO-ǵa tolyǵymen adal ekenin bilemiz, — dedi ol.
Buǵan deıin Brıýsselde NATO-nyń 75 jyldyq mereıtoıy saltanatty túrde atap ótiletinin jazǵan bolatynbyz.
Alıanstyń qurylýy men keńeıý tarıhy týraly osy silteme arqyly oqı alasyz.