Nátıjeli jumyspen qamtý jáne jappaı kásipkerlikti damytý úshin BQO-ǵa 3539,8 mln. teńge bólindi
ORAL. QazAqparat - Elbasy tapsyrmasyna sáıkes nátıjeli jumyspen qamtý jáne jappaı kásipkerlikti damytý baǵdarlamasyn júzege asyrý úshin Batys Qazaqstan oblysyna 3539,8 mln. teńge bólindi. Bul týraly búgin Ortalyq kommýnıkatsııalar qyzmeti óńirlik fılıalynda oblys ákiminiń orynbasary Marat Toqjanov málim etti, dep habarlaıdy «QazAqparat» tilshisi.
Onyń aıtýynsha, baǵdarlamanyń birinshi baǵyty boıynsha tehnıkalyq jáne kásiptik bilimi bar kadrlardy daıarlaý baǵytynda bıyl 800 adamdy oqytý josparlanýda. Sonymen birge jumysshy kadrlardy eńbek naryǵynda suranysqa ıe kásipter boıynsha daıarlaý baǵytynda 677 adam qysqa merzimdi oqytýdan ótpek. Qazirgi tańda qysqa merzimdi kýrstarda oqytylatyndar sanyn 1077 adamǵa deıin (qarajaty - 202,4 mln. teńge) jetkizý jóninde usynys engizildi.
Baǵdarlama boıynsha óńirde tehnıkalyq jáne kásiptik bilimmen barlyǵy 4 myń (jyl saıyn 800 adamnan), qysqa merzimdi kásiptik oqytýmen 5 myńǵa jýyq adam qamtylmaqshy.
Baǵdarlamanyń ekinshi baǵyty (jappaı kásipkerlikti damytý) boıynsha qazirgi tańda oblystyq kásipkerler palatasy bes aýdanda (Aqjaıyq, Jańaqala, Qaztalov, Zelenov jáne Terekti) 937 qatysýshyny «Bastaý bıznes» jobasy boıynsha oqytýda. Sonymen qatar kásipkerlik qyzmetin júzege asyrý úshin 374 azamatqa 1768,7 mln. teńge nesıe bólý máselesi qarastyrylýda. Sonyń ishinde 1474,0 mln. teńge 300 aýyl, 294,7 mln. teńge 74 qala turǵynyna berilmekshi.
Baǵdarlamanyń úshinshi baǵyty boıynsha bıyl jumyspen qamtýdyń belsendi sharalaryna 7008 adamdy tartý kózdelse, kúni búgin 1772 adam jumysqa joldandy.
«Elbasy bıylǵy Joldaýynda jańadan ashylǵan jumys oryndarynyń sany burynǵysha Úkimet pen ákimder qyzmetiniń tıimdiligin baǵalaýdyń negizgi krıterııiniń biri ekendigi jóninde atap ótken bolatyn. Osyǵan oraı QR Eńbek jáne halyqty áleýmettik qorǵaý mınıstrligi men oblys ákimi arasynda jasalǵan jumys oryndaryn ashý jónindegi memorandýmǵa sáıkes bıyl 18 myńnan astam jumys ornyn ashý kózdelýde. Sonymen qatar 2017 jyly oblys halqyn jumyspen qamtýdyń keshendi jospary jasalyp, 17035 adamdy jumyspen qamtý josparlandy. Qazirgi tańda 3634 adam túrli sharalarmen qamtyldy», dedi M.Toqjanov.
