Nátıjeli jumyspen qamtý baǵdarlamasyna sáıkes BQO-ǵa 4,3 mlrd teńge bólindi
ORAL. QazAqparat - 2017-2021 jyldarǵa arnalǵan Nátıjeli jumyspen qamtý jáne jappaı kásipkerlikti damytý baǵdarlamasy aıasynda bıyl BQO-ǵa 4,3 mlrd teńge bólinip otyr, dep habarlaıdy «QazAqparat» tilshisi.
Kásipkerler quqyǵyn qorǵaýǵa arnalǵan «Qýatty bıznes - qýatty Qazaqstan» atty forýmda oblys ákiminiń orynbasary Igor Steksovtyń atap ótkenindeı, osy kókeıkesti máselege Elbasy únemi kóńil bólip, naqty tapsyrmalar berip keledi. Memleket basshysynyń «Prezıdenttiń áleýmettik bes bastamasy» atty úndeýinde de shaǵyn nesıe berýdi kóbeıtý týraly aıtylǵany belgili. Osy oraıda Batys Qazaqstan oblysyna da úlken qoldaý kórsetilýde. Mysaly, 2016 jyly «Bıznestiń jol kartasy - 2020» biryńǵaı baǵdarlamasyn júzege asyrýǵa 1,6 mlrd teńge bólinse, ótken jyly bul kórsetkish 200 mln teńgege kóbeıdi. Bıyl qosymsha 1,3 mlrd teńge bólý kózdelýde. Sol sekildi Nátıjeli jumyspen qamtý jáne jappaı kásipkerlikti damytý baǵdarlamasy aıasynda 2017 jyly oblysqa 2,6 mlrd teńge qaralsa, bıyl odan áldeqaıda kóbeıip otyr. Ákimshilik kedergilerdi qysqartý baǵytynda naqty jobalar qolǵa alyndy.
QR Memlekettik qyzmet isteri jáne sybaılas jemqorlyqqa qarsy is-qımyl agenttigi BQO boıynsha departamentiniń basshysy, ádep jónindegi keńes tóraǵasy Bolat Isaqovtyń aıtýynsha, oblysta 37 myń kásipkerlik nysany bolsa, olarda ekonomıkalyq belsendi halyqtyń úshten biri nemese 110 myńnan astam adam eńbek etedi. Jalpy óńirlik ónimniń 42 paıyzdaıyn shaǵyn jáne orta bıznes nysandary óndiredi.
Sybaılas jemqorlyqqa qarsy is-qımyl ulttyq bıýrosynyń BQO boıynsha departamenti basshysynyń mindetin atqarýshy Rýstam Aqmyrzaevtyń sózine qaraǵanda, 2015-2017 jyldary shaǵyn jáne orta bıznes qyzmetine zańsyz aralasýdyń 35 deregi anyqtalyp, sol boıynsha 19 adam qylmystyq jaýapkershilikke tartyldy. Osy 19-dyń ony jergilikti atqarý organdarynda jumys jasaıdy. Sondaı-aq sońǵy úsh jylda kásipkerlik qyzmetke kedergi keltirý derekteri (12 qylmystyq is qozǵalǵan) aýyl sharýashylyǵy salasynda jıi kezdesýde.
Jıynda kásipkerler quqyǵyn qorǵaý baǵytynda usynys-pikirler talqyǵa salynyp, «Qoǵamdyq baqylaý kartasy» jobasy tanystyryldy. Forým sońynda QR Memlekettik qyzmet isteri jáne sybaılas jemqorlyqqa qarsy is-qımyl agenttigi BQO boıynsha departamenti jáne QR «Atameken» ulttyq kásipkerler palatasynyń óńirlik fılıaly arasynda ózara yntymaqtastyq týraly jol kartasyn júzege asyrýǵa arnalǵan is-sharalar josparyna qol qoıyldy.
