Nátıjeli jumyspen qamtý baǵdarlamasy aıasynda 26 myń azamat qysqa merzimdi kýrstan ótedi
ASTANA. QazAqparat - Nátıjeli jumyspen qamtý baǵdarlamasy aıasynda 26 myń azamat qysqa merzimdi kýrstan ótedi. Bul týraly búgin Úkimettiń selektorlyq rejimdegi otyrysynda QR Bilim jáne ǵylym mınıstri Erlan Saǵadıev málim etti, dep habarlaıdy QazAqparat.
Mınıstrdiń aıtýynsha, Nátıjeli jumyspen qamtý jáne jappaı kásipkerlikti damytý baǵdarlamasy aıasynda 1-6 aılyq qysqa merzimde kásiptik oqytý júrgiziledi. Oǵan 29 jasqa deıingi jáne jumyssyz júrgen, ózin-ózi jumyspen qamtyǵan azamattar qatysa alady.
«Barlyq qatysýshylar shákirtaqymen, jolaqymen jáne tegin jatatyn oryndarmen qamtamasyz etiledi. Kásiptik oqytý júrgizetin 380 bilim berý uıymynyń tizbesi ázirlendi. Kýrstarymyz daıyn. Baǵdarlamalar óńirlik kásipkerler palatasymen kelisip bekitildi. Bul baǵyt arqyly 26 myń azamat qysqa merzimdi kýrstan ótedi dep oılap otyrmyz. Bıýdjetten 6,3 mlrd. teńge qarastyrylǵan. Bul jobany sáýirdiń 1-inen Aqtóbe men Astana qalalary bastap ketti. Búgingi kúni 350 azamat kýrstarda bilim alýda. Kelesi 4 myń azamattyń tizimi daıyn. Olardy da oqyta bastaımyz», - dedi ol.
Onyń sózine qaraǵanda, Bilim jáne ǵylym mınıstrligi bul jobany baqylaýǵa alyp, aı saıyn monıtorıng júrgizý arqyly aqparat berip otyratyn bolady.
Aıta keteıik, buǵan deıin habarlaǵanymyzdaı, bıyl 20 myń balanyń mamandyq alyp shyǵýy úshin4,3 mlrd. teńge bólindi.
