«National Tourism Awards» syılyǵy taǵaıyndaldy
ASTANA. QazAqparat - «Kazakh Tourism» ulttyq kompanııasy týrızm salasyndaǵy jańa syılyqty tanystyrdy, dep habarlaıdy QazAqparat tilshisi.
Kompanııa basshysy Rashıd Kúzembaevtyń aıtýynsha, «National Tourism Awards» sııaqty syılyqtar shetelde jıi tabystalady. Negizgi maqsat - týrızm salasyndaǵy úzdikterdi anyqtaý. Qazaqstandaǵy konkýrs pılottyq joba retinde qolǵa alynyp otyr.
«Eger osy bastamamyz sátti iske asatyn bolsa, onda ol konkýrsty jyl saıyn uıymdastyratyn bolamyz. Bul joly barlyq daıyndyq sharalary úsh kezeń boıynsha atqaryldy. Aldymen sarapshylar keńesi quryldy. Oǵan salalyq qaýymdastyqtar kiredi. Olar barlyq ótinishterdiń ishinen úzdik bestikti anyqtady. Ekinshi kezeńde onlaın rejımde daýys berildi. Sonyń nátıjesinde úzdik úshtik shyqty. Al úshinshi kezeńde qazylar alqasy jeńimpazdardy iriktep aldy», - deıdi R.Kúzembaev.
Aıta keteıik, «National Tourism Awards» syılyǵy 17 atalymnan turady. Jeńimpazdardyń tolyq tizimi 8 jeltoqsanda jarııalanady.
