«National Geographic Qazaqstan» jýrnalynyń qazaq tilindegi alǵashqy sany jaryqqa shyqty
ASTANA. QazAqparat - Áıgili «National Geographic» jýrnalynyń qazaq tilindegi alǵashqy sany jaryqqa shyqty. Bul elimizde memlekettik tilde taralatyn tuńǵysh sheteldik basylym bolyp tabylady.
«Jýrnaldyń birinshi beti Qazaqstan Respýblıkasynyń Prezıdenti Nursultan Nazarbaevtyń shyǵarmashylyq ujymǵa joldaǵan arnaıy quttyqtaý hatymen ashylǵan. Onda Elbasy: «Men álemge áıgili basylymnyń Qazaq jerinde, qazaq tilinde jaryq kórýin ana tilimizdiń halyqaralyq deńgeıdegi taǵy bir jetistigi dep baǵalaımyn», - dep atap ótedi. Sondaı-aq, Memleket basshysy Uly daladaǵy aıshyqty tabıǵat pen shejireli tarıhty, keń baıtaq Qazaqstannyń týrıstik áleýetin dáıekti derektermen baıandap, álem jurtyna jan-jaqty nasıhattaý - eńseli eldiktiń belgisi ekenin aıtady», - delingen baspasóz baıanynda.
Basylym alǵashqy sanynan-aq Qazaqstandaǵy ózekti ekologııalyq problemalarǵa nazar aýdaryp otyr. «Aral taǵdyry - adam taǵdyry» dep atalatyn maqalada ǵalamsharymyzdyń eń úlken sý qoımasy, Ortalyq Azııanyń mańyzdy strategııalyq nysany - Aral teńiziniń búgingi jaı-kúıi baıandalǵan.
«National Geographic Qazaqstan» jýrnalynyń negizgi maqsaty -ekologııalyq máselelermen qatar, elimizdiń qaıtalanbas sulý tabıǵatyn, ósimdikter men jan-janýarlar dúnıesiniń alýandyǵyn nasıhattaý. Sondaı-aq, qazaqstandyq ǵalymdar men zertteýshilerdiń ǵylymı izdenisterine aqparattyq qoldaý kórsetý. Osy maqsatta jýrnal ujymy bıyl elimiz boıynsha birqatar zertteý ekspedıtsııalary men fotokórmeler uıymdastyrmaq.
«National Geographic» jýrnalynyń tarıhy sonaý 1888 jyldan bastalady. Qazir álemniń 38 tilinde 80-nen astam elge taralady. Bir qýanarlyǵy, ol Ortalyq Azııa aımaǵynda birinshi bolyp Qazaqstanda jaryq kórip otyr.
