«National Geographic Qazaqstan» jýrnaly elimizdi jahanǵa tanytady - D.Myńbaı
ASTANA. QazAqparat - Búgin Qazaqstan Respýblıkasy Ulttyq mýzeıinde «National Geographic Qazaqstan» jýrnalynyń jaryq kórýine oraı otandyq jáne AQSh ǵalymdarynyń qatysýymen dóńgelek ústel ótti.
Ulttyq mýzeıdiń aqparattyq-ımıdjdik qyzmetiniń habarlaýynsha, jıynnyń ashylýynda sóz alǵan Ulttyq mýzeı dırektory Darhan Myńbaı atalmysh jýrnaldyń jumystaryn elimizde júrgizip otyrǵan azamattarǵa alǵys bildire kele, basylymnyń mańyzdylyǵy týraly aıtyp ótti.
«National Geographic Qazaqstan» jýrnalynyń jaryq kórýine Elbasynyń ózi kóńil aýdaryp, joǵary baǵa bergen bolatyn. Sondyqtan da osy istiń basy-qasynda júrgen azamattarǵa alǵys bildirgim keledi. Álem boıynsha 700 mln aýdıtorııasy bar bul basylym bizdiń elimizdi jahanǵa tanytyp qana qoımaı, týrısterdiń qyzyǵýshylyǵyn da oıatady dep oılaımyn. Sol sebepti de biz ekijaqty áriptestik ornatyp, árqashan qoldaý kórsetýge daıynbyz», - dedi D.Myńbaı.
«National Geographic» qoǵamdyq zertteý baǵdarlamalary vıtse-prezıdenti Aleksander Moen Ulttyq mýzeı kórsetken qoldaýlarǵa alǵys aıta kele, «National Geographic» jýrnalynyń atqaryp kele jatqan basty mıssııasyna toqtalyp ótti.
«Arnaıy ekskýrsııanyń nátıjesinde Qazaq eliniń tereń tarıhymen, baı mádenıetimen keńinen tanysyp, erekshe áser alyp shyqtyq. «National Geographic» jýrnalynyń basty mindeti jazýshylardyń, ǵalymdardyń jumystaryn jarııalaý arqyly qorshaǵan ortany taný jáne ony qorǵaý. Qazaqstan tarapy bizben birigip, áriptestik ornatyp jatqanyna qýanyshtymyz. Ortalyq Azııada áli de bolsa aıtylmaı jatqan dúnıeler jeterlik. Aldaǵy ýaqytta osy jumystardy atqarý úshin úlken maqsattar qoıyp otyrmyz», - dedi A.Moen.
Eki dúrkin Pýlıttser syılyǵynyń ıegeri, belgili jıhankez Pol Salopek Ulttyq mýzeıdegi adamzat tarıhynyń qundy jádigeri bolyp tabylatyn sırek eksponattardyń saqtalý, nasıhattalý jumystaryna joǵary baǵa bere kele, «Álemdik serýen» jobasyna toqtalyp ótti.
«Ulttyq mýzeıdiń zaldaryn aralaı kele, úlken áser alyp shyqtyq. Memleket barlyq jaǵdaıdy jasap otyr eken. Bul quptarlyq saıasat dep oılaımyn. Men qazirgi ýaqytta «Álemdik serýen» jobasy aıasynda júz myń jyl buryn ata-babalarymnyń tabany tıgen joldarmen júrip kelemin. Saıahatymdy 2013 jyly qańtar aıynda Efıopııa elinen bastadym. Osy jolda kezdesken adamdardan estip-bilgen áńgimelerdi jazyp, keıin onyń bárin ǵylymı eńbek úshin paıdalanamyn, - dedi P.Salopek.
Sonymen qatar, jıyn barysynda tuńǵysh ret qazaq tilinde jaryq kórip jatqan «National Geographic Qazaqstan» jýrnaly men bedeldi basylym qozǵaıtyn geografııa, arheologııa, antropologııa salalaryndaǵy sońǵy jańalyqtar sóz etildi. 
