Natalıa Bogdanova dúnıejúzindegi úzdik boksshy atandy
ASTANA. KAZINFORM — Qazaqstandyq boksshy Natalıa Bogdanova — 2025 jylǵy áıelder arasyndaǵy «Jankúıerler tańdaýy boıynsha úzdik boksshy» atanǵany belgili boldy.
— Áıelder arasyndaǵy olımpıadalyq stıldegi boksta kóshbasshylyq úshin ótken jarysta álem chempıonatynyń altyn júldegeri jáne World Boxing Cup — Astana 2025 týrnıriniń chempıony @bogdanova__99 aıqyn jeńiske jetti. Ol fınalda ekinshi oryn alǵan Sýnnıva Hofstadtan 15 000-nan astam laık jınap, basym tústi. Natalıany osy marapatymen jáne rıngtegi keremet maýsymymen quttyqtaımyz! 2026 jyly barlyq úmitkerdi qaıtadan rıngte kóremiz dep úmittenemiz — eń qyzyǵy áli alda! — delingen World.boxing.events habarlamasynda.
Soltústik Qazaqstan oblysynyń ákimi Ǵaýez Nurmuhambetov Natalıany jeńisimen quttyqtady.
— Natalıa — tabandylyq pen qajyrly eńbektiń jarqyn úlgisi. Onyń bul tamasha jetistigi tek óz talanty men eńbeginiń ǵana emes, bapkeri Dastannyń zor qoldaýynyń arqasynda múmkin boldy. Barlyq oblys turǵyndarynyń atynan jáne jeke óz atymnan Natalıa men Dastandy osy keremet jeńisterimen shyn júrekten quttyqtaımyn! — dedi óńir basshysy.
Budan buryn Mahmud Sabyrhan men Natalıa Bogdanova «Jyldyń úzdik boksshysy» nomınatsııasyna usynylǵanyn jazǵanbyz.
Eske salsaq, Anglııanyń Lıverpýl qalasynda World Boxing aıasynda ótip jatqan álem chempıonatynda Natalıa Bogdanova (70 keli) altyn medal aldy.