Natalıa Bogdanova álem chempıonatynda qola júldeger atandy

ASTANA. KAZINFORM — Qazaqstandyq boksshy Natalıa Bogdanova (70 keli) áıelder arasyndaǵy álem chempıonatynda qola júldeger atandy.

Serbııanyń Nısh qalasynda ótip jatqan dúbirli dodanyń jartylaı fınalynda ol Lıza Edel O’Rýrkpen kezdesti.

Jekpe-jek barysynda qos qarsylas tartysty báseke ótkizdi. Natalıanyń sál basymdyǵy baıqalyp turdy. Alaıda ırlandııalyq boksshy da ońtaıly sátte soqqy jumsap úlgerdi.

Nátıjesinde Natalıa Bogdanova qarsylasyna ese jiberip, álem chempıonatynyń qola júldesin qanaǵat tutty.

Natalıa Bogdanova qazirge deıin álem chempıonatynda mundaı joǵary tabysqa jetken joq. 1999 jyly dúnıege kelgen ol 2022 jyly Jazǵy Azııa oıyndarynda qola júldeger atanǵan edi. Ázirge odan basqa qol jetkizgen júldesi joq.

Qazirge deıin el quramasynan Vıktorııa Grafeeva (60 keli), Nazym Qyzaıbaı (48 keli), Alýa Balqybekova (50 keli), Aıda Ábikeeva (63 keli) fınalǵa joldama aldy.

Endi el quramasynan Eldana Tálipova (81 keliden joǵary) sharshy alańǵa shyǵady.
Jartylaı fınalǵa deıin Jaına Shekerbekova (54 keli), Jasmın Qızatova (66 keli), Karına Ibragımova (57 keli), Nadejda Rıabets (75 keli), Anıta Adısheva (52 keli), Gúlsaıa Erjan (81 keli) jarys jolynan shyǵyp qaldy.