Natalıa Alonso Kano: Ortalyq Azııa landshafyn qalpyna keltirý – apat táýekelin azaıtýdyń negizgi strategııasy
ASTANA. KAZINFORM – Ortalyq Azııanyń transshekaralyq landshaftaryn qalpyna keltirý apat táýekelderin azaıtýdyń negizgi strategııasy. Bul týraly Óńirlik ekologııalyq forýmnyń taqyryptyq sessııasynda BUU-nyń Apattar táýekelin azaıtý jónindegi Eýropa jáne Ortalyq Azııa óńirlik keńsesiniń basshysy Natalıa Alonso Kano aıtty.
- Ortalyq Azııada transshekaralyq landshafttardy qalpyna keltirýdiń asa mańyzdy ekenin bilemiz. Óńir klımattyń ózgerý áserin bastan keship, ony baǵalap otyr. Muzdyqtardyń sheginýin, temperatýranyń kóterilýin, aptap ystyqtyń jıileýin, qurǵaqshylyq pen sý tasqynyn kórip otyrmyz. Munyń bári shekaraǵa táýelsiz oryn alýda. Qaýip-qaterlerdiń de alys emes ekenin túsinemiz. Óıtkeni olar ekonomıkaǵa, ekojúıelerge jáne adamdardyń ómirine áser etedi. Sonymen qatar bul qubylystardyń qarqyn alyp, jıilegenin, ózara baılanysy kúsheıe túskenin bilemiz. Jappaı sý tasqyndary men kóshkinder bolyp jatyr, - dedi mártebeli meıman.
Onyń aıtýynsha, munyń bári klımattyń ózgerýiniń jáne ekojúıelerdiń tozýynyń saldary.
- Mundaı táýekelder ulttyq shekaralaryzda toqtap qalmaıdy. Sondyqtan apattardyń shekarasy joq ekenin túsinýimiz kerek. Olar transshekaralyq sıpatqa ıe bolyp, ortaq ózen arnalaryna, basseınderge jáne taý júıelerine áser etedi. Bul bizdi mańyzdy bir máselege nazar aýdarýǵa májbúrleıdi. Landshafttardy qalpyna keltirý tek ekologııalyq basymdyq qana emes, bul – apat táýekelderin azaıtýdyń negizgi strategııasy. Ekojúıelerdi qalpyna keltire otyryp, táýekelderdi de azaıtamyz, - dedi Natalıa Alonso Kano.
Buǵan deıin Qazaqstan «Ortalyq Azııanyń jasyl qalqany» bastamasyn usynǵan edi.
