Natalıa Slekıshınany zorlaǵan burynǵy ádilet maıoryna qatysty sot úkimi shyqty
ALMATY. QazAqparat - Almaty qalasynyń Túrkisib aýdandyq sotynda túrmedegi Natalıa Slekıshınanyń isine qatysty aıyptalýshyǵa úkim shyqty.
Sot úkimimen LA-155/18 Qylmystyq atqarý júıesi tergeý abaqtysynyń burynǵy qyzmetkeri Rýslan Hakimov 9 jylǵa bas bostandyǵynan aıyrylyp, múlki tárkilenetin boldy. Ol jazasyn jalpy rejimdegi kolonııada óteıdi. Sonymen qatar, ol ádilet maıory sheninen aıyryp, ómirboıy memlekettik qyzmette jumys jasaýyna tyıym saldy.
Aıta keteıik, Rýslan Hákimovke qatysty qylmystyq is Almaty qalasynyń Túrkisib aýdandyq sotyna 26 shildede túsken.
Basty kúdikti Rýslan Hákimovke QR Qylmystyq Kodeksiniń 362-shi baby 4-shi tarmaǵynyń 1-shi bóligi (qyzmet babyn asyra paıdalaný) jáne 120-shy baby 2-shi tarmaǵynyń (zorlaý) 4-shi bóliginde (áldeneshe ret) qarastyrylǵan quqyq buzýshylyqtardy jasaǵan degen aıyp taǵylǵan.
Sotqa deıingi tergeý amaldary 25 shildede aıaqtalǵan.
Eske sala keteıik, sottalýshy Natalıa Slekıshına bıyl shilde aıynyń basynda qamaýda zorlanǵanyn, sodan júkti bolyp, bosanǵandyǵyn jarııa etken bolatyn. Onyń aıtýynsha, túrme basshylyǵy alǵashynda zorlaý týraly isti jasyrmaq bolǵan. Alaıda, saraptama qylmystyq iske qatystylardyń biriniń náresteniń ákesi ekenin rastady.
Zorlaý oqıǵasy QR ІІM Qylmystyq atqarý júıesi komıtetiniń LA-155/18 memlekettik mekemesiniń tergeý abaqtysynda bolǵan. Natalıa Slekıshınanyń aıtýynsha, ony osy mekemeniń tórt qyzmetkeri zorlaǵan.
N.Slekıshına túrmedegi merzimin qysqartýdy surap Almaly sotyna ótingenin onyń advokaty Aıman Ýmarova buǵan deıin habarlaǵan bolatyn. Aıta keteıik, N.Slekıshınanyń ózi azamattyq nekedegi kúıeýiniń úıine qaraqshylyq shabýyl jasaǵany úshin sottalyp, qazirgi ýaqytta jazasyn ótep jatyr.
