Natalıa Slekıshına ýaqytsha bostandyqqa shyqty
ALMATY. QazAqparat - Almaty oblysynyń soty qaraqshylyq shabýyl jasap, iri kólemde aqsha urlap sottalǵan Natalıa Slekıshınany jas nárestesine baılanysty bostandyqqa shyǵarý týraly sheshimin óz kúshinde qaldyrdy, dep habarlaıdy QazAqparat tilshisi.
N.Slekıshınanyń qorǵaýshysy Aıman Omarova Іle aýdandyq soty jazany óteý merzimin keıinge qaldyrý týraly sheshim shyǵarǵanyn aıtty.
«Slekıshınanyń jazany óteý merzimin keıinge qaldyrý týraly ótinimi jartylaı qanaǵattandyryldy», - dedi advokat.
Jazany óteýshi Almaty qalasy Alataý aýdandyq sotynyń 2015 jylǵy 23 mamyrdaǵy úkimi boıynsha sottalǵan bolatyn. Endi 2016 jyly týǵan sábıine baılanysty onyń jazany óteý merzimi 5 jylǵa keıinge shegerildi.
Aıta keteıik, sottyń bul sheshimine Slekıshınanyń burynǵy enesi qarsy shyǵyp, aryzdanǵan bolatyn. Alaıda, sot sheshimi óz kúshinde qalyp, onyń aryzy qanaǵattandyrylmady.
Eske sala keteıik, sottalýshy Natalıa Slekıshına 2016 jyldyń shilde aıynyń basynda qamaýda zorlanǵanyn, sodan júkti bolyp, bala tapqanyn jarııa etken edi. Onyń aıtýynsha, túrme basshylyǵy alǵashynda zorlaý týraly isti jasyrmaq bolǵan. Alaıda, saraptama qylmystyq iske qatystylardyń biri náresteniń ákesi ekenin rastady.
Zorlaý oqıǵasy QR ІІM Qylmystyq atqarý júıesi komıtetiniń LA-155/18 memlekettik mekemesiniń tergeý abaqtysynda bolǵan. Natalıa Slekıshınanyń aıtýynsha, ony osy mekemeniń tórt qyzmetkeri zorlaǵan.
Osydan keıin, sot úkimimen 2016 jyldyń 30 qyrkúıeginde LA-155/18 Qylmystyq atqarý júıesi tergeý abaqtysynyń burynǵy qyzmetkeri Rýslan Hakimov 9 jylǵa bas bostandyǵynan aıyryldy.
Basty kúdikti Rýslan Hákimovke QR Qylmystyq Kodeksiniń 362-shi baby 4-shi tarmaǵynyń 1-shi bóligi (qyzmet babyn asyra paıdalaný) jáne 120-shy baby 2-shi tarmaǵynyń (zorlaý) 4-shi bóliginde (áldeneshe ret) qarastyrylǵan quqyq buzýshylyqtardy jasaǵan degen aıyp taǵylǵan.
