Natalıa Slekıshına sot úkimine rıza ekenin aıtty
ALMATY. QazAqparat - Almaty qalasynyń Túrkisib aýdandyq sotynda túrmedegi Natalıa Slekıshınanyń isine qatysty aıyptalýshyǵa úkim shyqty. Aıyptalýshy Rýslan Hakimov sot úkimimen múlki tárkilene otyryp, 9 jylǵa bas bostandyǵynan aıyryldy.
Úkim jarııa etilgennen keıin Natalıa Slekıshına jýrnalısterge sot úkimine rıza bolǵanyn aıtty.
«Sot úkimine rızamyn. Biz qalǵandaryn da jaýapqa tartqyzamyz. Meni advokattan bas tartýǵa májbúrledi. Maǵan QAJ basshysy, onyń aty Manas, sol qoqan-loqqy jasady, sosyn TI-18 basshysy Ermek Omarbekov pen tergeý ızolıatorynyń qyzmetkeri Janna Muqasheva advokattan bas tartýǵa májbúrledi», - dedi Slekıshına.
Natalıa Slekıshınanyń aıtýynsha, endi ol Hakimovtan qyzyna alıment tólettirý jaǵyn qolǵa almaq.
Aıta keteıik búgin, sot úkimimen LA-155/18 Qylmystyq atqarý júıesi tergeý abaqtysynyń burynǵy qyzmetkeri Rýslan Hakimov 9 jylǵa bas bostandyǵynan aıyryldy.
Basty kúdikti Rýslan Hákimovke QR Qylmystyq Kodeksiniń 362-shi baby 4-shi tarmaǵynyń 1-shi bóligi (qyzmet babyn asyra paıdalaný) jáne 120-shy baby 2-shi tarmaǵynyń (zorlaý) 4-shi bóliginde (áldeneshe ret) qarastyrylǵan quqyq buzýshylyqtardy jasaǵan degen aıyp taǵylǵan.
Eske sala keteıik, sottalýshy Natalıa Slekıshına bıyl shilde aıynyń basynda qamaýda zorlanǵanyn, sodan júkti bolyp, bala tapqandyǵyn jarııa etken bolatyn. Onyń aıtýynsha, túrme basshylyǵy alǵashynda zorlaý týraly isti jasyrmaq bolǵan. Alaıda, saraptama qylmystyq iske qatystylardyń biriniń náresteniń ákesi ekenin rastady.
Zorlaý oqıǵasy QR ІІM Qylmystyq atqarý júıesi komıtetiniń LA-155/18 memlekettik mekemesiniń tergeý abaqtysynda bolǵan. Natalıa Slekıshınanyń aıtýynsha, ony osy mekemeniń tórt qyzmetkeri zorlaǵan.
