Natalıa Godýnova tabıǵı monopolııa jeke sýbektileriniń taýar satyp alý rásimderin synǵa aldy
Bul týraly Májilistiń jalpy otyrysynda jylýmen jabdyqtaý salasyndaǵy aýdıtorlyq is-sharanyń qorytyndysyn talqylaý kezinde Joǵary aýdıtorlyq palata tóraǵasy Natalıa Godýnova aıtty, dep habarlaıdy QazAqparat tilshisi.
«Satyp alýdy ótkizý kezinde adal básekelestik jáne barlyq ónim berýshilerge teń múmkindikterdi qamtamasyz etý qaǵıdattary tıisti deńgeıde saqtalmaıdy. Úlestes adamdardan taýar alý jáne olardyń qyzmetine júginý máselesine qatysty shekteýler joq. Sondaı-aq, tarıftik smetada eskerilgen taýarlardy satyp alýdy baqylaıtyn Tabıǵı monopolııalardy retteý komıteti turaqty monıtorıngti atqarýy tıis. Alaıda komıtet elektrondy tártipte satyp alýdyń kommertsııalyq aqparattyq júıelerin baqylaýdan tys qalyp otyr. Bul turǵyda áleýetti ónim berýshilerden jazbasha shaǵym túsken kezde ǵana baqylaý júrgiziledi. Aýdıt jasalǵan úsh jyl ishinde tek 23 shaǵym túsken», - dedi N. Godýnova.
Onyń paıymynsha, tabıǵı monopolııalar salasyndaǵy ýákiletti organnyń atalǵan júıeni emin-erkin baqylaýyn qamtamasyz etý kerek. Bul turǵyda tabıǵı monopolııalardyń jeke sýbektileriniń elektrondy satyp alýlary baǵytynda biryńǵaı aqparattyq júıesin engizý mańyzdy.
Budan buryn habarlanǵandaı, Joǵary aýdıtorlyq palata jylýmen jabdyqtaý salasynda qarajatty tıimsiz ıgerý derekterin anyqtady.
Jylý berý salasyndaǵy memlekettik retteý birneshe memlekettik organǵa júktelgendikten, jylý energetıkasyn damytýda júıeli tásil joq.
