Natalıa Godýnova: Syrttan qaryz alyp, ony tıimsiz jumsaǵany úshin qatań jaýapkershilik bolýy kerek

NUR-SULTAN. QazAqparat – Ulttyq qor qarajatyn basqarýdyń tásilderin qaıta qaraý qajet. Bul týraly QR Parlamenti palatalarynyń birlesken otyrysynda Respýblıkalyq bıýdjettiń atqarylýyn baqylaý jónindegi esep komıtetiniń tóraıymy Natalıa Godýnova aıtty, dep habarlaıdy QazAqparat tilshisi.

«Ósip kele jatqan memlekettik borysh eldegi makroekonomıkalyq turaqtylyq táýekelderin týǵyzady. Buǵan qarsy turatyn qaýqar áli bar. Biraq qabyldanǵan boryshtyq mindettemeler boıynsha bizdiń naqty tujyrymdalǵan óz esebimiz bolǵanyn, boryshty qashan, qandaı kózderden jáne qandaı kólemde óteý josparlanýyn qalar edik. Jáne de bir-úsh jylǵa emes, kem degende 10 jylǵa eseptelýi kerek. Bul jerde aıqyndyq pen ashyqtyq qajet», - dedi Natalıa Godýnova.

Sondaı-aq ol memlekettik organdardyń aǵymdaǵy qyzmetin iske asyrý, halyqaralyq konsýltanttardy tartý jáne sheteldik tájirıbeni zerdeleý úshin syrtqy qarjylandyrý kózderin tartý praktıkasyn joıý qajettigin basa aıtty.

«Bizde osy mindetterdi iske asyrý úshin ózimizdiń qarjylyq jáne adamı resýrstarymyz jetkilikti. Syrtqy qaryzdy tıimsiz tartqany jáne paıdalanǵany úshin, sondaı-aq olardy ýaqtyly ıgermegeni ári kúshin joıǵany úshin derbes jaýaptylyqty qatańdatý talap etiledi. Bul jóninde depýtattar da aıtqan bolatyn», - dedi komıtet tóraıymy.