Natalıa Godýnova halyqtyń naqty tabysynyń ósýine qatysty pikir bildirdi

NUR-SULTAN. QazAqparat – Qazaqstannyń makroekonomıkalyq turaqtylyǵy boıynsha pozıtsııa jaqsardy. Bul týraly Májilistiń jalpy otyrysynda 2019 jylǵy respýblıkalyq bıýdjettiń atqarylýy týraly esepti talqylaý kezinde Esep komıtetiniń tóraıymy Natalıa Godýnova málim etti, dep habarlaıdy QazAqparat tilshisi.

«Dúnıejúzilik ekonomıkalyq forýmnyń jahandyq básekege qabilettik reıtınginde Qazaqstannyń makroekonomıkalyq turaqtylyǵy boıynsha pozıtsııa jaqsardy. Munaıǵa degen táýeldilikti tómendetý tendentsııasyna qol jetkizilmedi. 10 jyl boıyna óńdeýshi sektor úlesi 11 paıyzdan aspady. Eksport qurylymynda mıneraldy ónim 70 paıyzdan asty. Azamattar ál-aýqaty ósimń boıynsha maqsat qalaı oryndalyp jatyr? Halyqtyń naqty tabysy 5,5 paıyzǵa ósti. Alaıda, halyq shyǵystarynda azyq-túlik taýarlarynyń úlesi artty, ıaǵnı 50 paıyzǵa deıin. Damyǵan elderde bul kórsetkish 10 paıyz shamasynda», - dedi N. Godýnova.

Onyń sózine qaraǵanda, Reseı men Belarýste osy kórsetkish azamattar shyǵystarynyń úshten bir bóliginen aspaıdy.

Sonymen qatar ol memlekettik qaryzǵa qatysty pikir bildirdi.

«Memlekettik borysh, ıaǵnı Úkimet qaryzy sekildi qaýipsiz deńgeıde. Qaryzdy jabýǵa qatysty ári osy baǵytta qyzmet kórsetý baǵytyndaǵy shyǵystar artyp keledi. Úkimettik qaryz boıynsha osyndaı shyǵystar 1 trln 400 mlrd teńgege jýyqtady», - dedi ol.

Esep komıtetiniń tóraıymy byltyr memlekettik-jekeshelik seriktestik, kvazımemlekettik sektor men jergilikti atqarýshy organdar jobalary boıynsha halyqaralyq qarjy uıymdarynan zaımdardy qadaǵalaý turǵysynda tıisti jumystar atqarylǵanyn jetkizdi.

Budan buryn habarlanǵandaı, Májilistiń jalpy otyrysynda Qarjy mınıstri Erulan Jamaýbaev Qazaqstannyń boryshy qaýipsiz deńgeıde kenin atap ótti. Sonymen qatar ol kvazımemlekettik sýbektilerdiń shottaryndaǵy qaldyqtarǵa qatysty túsinik berdi.