Natalıa Arystanova: Qazaqtyń toıy bitpesin...

Sheber tiginshiniń qolynan shyqqan oıýmen órnektelgen kópshikter men jastyqtar men oramaldar túrli kádesyılar qalyń kórshilik qýana satyp alady. Natalıanyń tiginshilikti qolyna alǵanyna 20 jyldyń júzi bolǵan.

«Qazaqta toı kóp. Toılarymyz kóp bola bersin, amanshylyq bolsyn!. Sondyqtan mynadaı jastyqtarǵa «Qudaǵıym syrlasymdaı bolsyn» degen ádemi sózder jazamyz. Adamdar olardy syılyq retinde tamasha dep alyp jatyr. Kishkene ǵana oıý qossańyz da keremet ádemi bolyp kórinedi», - deıdi kásipker Natalıa Arystanova.

Kásibin keńeıtý maqsatynda Natalıa Qytaıdan qondyrǵy satyp alǵan. Stanok arnaıy kompıýterlik baǵdarlama arqyly qalaǵan sózdi avtomatty túrde jazyp beredi. Bul kqp ýaqytty shyǵyndamaı ónimdi mol etip shyǵarýǵa múmkindik beredi.

Kásipkerdiń saýda salasynda júrgenine 20 jylǵa jýyqtaǵan. Sondyqtan bul ónerdiń qyr-syryn jaqsy meńgergen. Ol kóbine óz isine Reseı men Qytaı matalaryn paıdalanady. Sheteldiń sapaly matalarynan «Qazaqstanda jasalǵan» ónim daıyndap halyqqa usynady.

«Kóbisi h/b deogen sózdi estıdi de, onyń ne zat ekenin tolyq túsinbeıdi. H/b degenimiz 100% maqtadan jasalǵan jumsaq mata. Dáke sekildi aıqastyra toqylǵan, jipterdiń arasynda araqashyqtyǵy alshaqtaý bolady, biraq jipteri qalyń. Sondyqtan aýa ótkizgish qasıeti joǵary bolady. Osyndaı matadan tigingen kıim kıseńiz terletpeıdi», - deıdi Natalıa Arystanova. Bolashaqta mundaǵy sheberler jańa jobalardy qolǵa almaq. Toıbastarlarmen quraq kórpeler jáne qyz jasaýyn tigemiz deıdi.

«Negizi qazirgi tsehimiz óte kishkentaı. Bolashaqta ony keńeıtsek degen oıymyz bar. Qazir «Damý» arqyly qarajat alýdy oılap otyrmyz. Qosymsha jabdyq alyp, adamdardy jumysqa alyp, olardy úıretpikshimin. Osylaısha kásibimdi eki ese keńeıtý oıymda bar», - deıdi kásipker.

Satylymdaǵy ónimder arnaıy dúkenge qoıylady. Natalıa Ivanovna satýshylardy jumysqa qabyldaǵan soń, menedjerlik baǵytta oqý kýrstaryn ózi júrgizedi. Sebebi halyqqa qyzmet kórsetetin maman usynyp otyrǵan taýardyń sapasyn, matasynyń áleýmetin túsindire alýy kerek. Bastysy kásipker úshin satýshylardyń qazaq tilinde qyzmet kórsetýi birinshi orynda. Sondyqtan keıbir qyzmetkerlerin qazaq tilin úırený kýrstaryna da jibergen.

«Qyzmetkerlerim qysqa merzimdi 21 kúndik kýrstardan ótti. Ol jerden arnaıy sertıfıkat aldy. Endi olardyń basym bóligi memlekettik tilde qyzmet kórsetedi. Eń jıi qoldanylatyn qazaq tilindegi sózderdi úırendi», -deıdi Natalıa Arystanova.

«Men osy jerde alty jyldan beri jumys istep kelemin. Natalıa Ivanovna óte ashyq kisi. Qajet bolǵan jaǵdaıda, árdaıym bizge kómek kórsetedi. Kóbinese bizben qazaqsha sóılesip, jumysta barlyǵyn qazaqsha túsindirip otyrady», - deıdi natalıa Arystanovanyń qol astynday jumys isteıtin satýshy Dıana Qalmaǵambetova.

Natalıa Arystanova qazaqtyń kelini. Barlyq salt-dástúrdi saqtaıdy. Bul otbasynda juma men mereke saıyn shelpek pisirip, maıdyń ıisin shyǵarý mindet. Ol Aqtóbe oblysyndaǵy Muǵaljar aýylynda týyp ósken. Orys mektebinde oqysa da, qazaqsha sóıleıdi.

«Qazaq balalardyń arasynda kúlip-oınap óstim, osylaısha qazaq tilin úırendim. Balalyq kezimde qaı tilde sóılep júrgenimizge asa mán bermeıtinbiz. Oıyn barysynda áıteýir shúldirlep júre beremiz. Qazaq tilinde jetik sóıleýime ósken ortam septigin tıgizdi dep oılaımyn», - deıdi Natalıa Arystanova.

Natalıa men joldasy ekeýi de Batys Qazaqstannyń týmasy bolsa da, taǵdyrlary Temirtaýda toǵysypty. Sebebi ekeýi de Qaraǵandy polıtehnıkalyq kolledjdiń túlegi. Biraq otaý qurǵan jyldary Shalqar aýylynda turyp, qara jumystyń qazanynda qaınaǵan. Óz kásipterin tapqansha erli-zaıypty ustazdyq qyzmet atqarǵan. Degenmen aýmaly- tókpeli 90 jyldary olarǵa da ońaı bolmapty. Sol kezderi halyqtyń bir-birine degen qoldaýy qıyndyqty jeńýge jol ashty deıdi ol.

Qazir Natalıa Arystanova eki balanyń anasy. Perzentteriniń boıyna qazaqtyń salt-dástúrin sińirýde. Ózge ult ókilimin dep jatsynbaı, osyǵan deıin tipti 24 balany qyrqynan shyǵarǵan eken. Bul dástúrdiń ózi birneshe rásimnen, yrymnan turady. Ár jón joralǵysyn qazaq kelini jaqsy biledi.

Al Ulystyń uly kúninde Natalıanyń tańy shelpek pisirýden bastalady. Dastarhanyn jaıyp, qonaǵyn qarsy alady. Sebebi bul meıram onyń otbasy úshin jańarǵan jańa jyl, jańa kún, jańa bastamalardyń jarshysy.