Nashar jumys istegenderge bonýs berilmeıdi - Shpekbaev eńbek aqy tóleýdiń jańa júıesi týraly
NUR-SULTAN. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev eńbek aqy tóleýdiń jańa júıesiniń arqasynda qyzmetshilerdiń áleýmettik-turmystyq jaǵdaıyn qalaı jaqsartqany jóninde aıtyp berdi, dep habarlaıdy QazAqparat.
Dostar, memlekettik qyzmettegi laıyqty eńbek aqy ańyz emes, shyndyq. Ótken jyl úshin bonýstar tóleý ýaqyty keldi.
« 2018 jyldan bastap jańa eńbekaqy júıesin engizdik. Ol eki bólikten turady: turaqty - bul faktorlyq-baldyq shkala negizindegi jalaqy jáne aınymaly - bonýstar. Birinshi bólim boıynsha bári túsinikti. Turaqty jalaqy belgilendi. Agenttik qyzmetkerleriniń jalaqysy eki esege artty, al júrgizilgen ońtaılandyrý men ákimshilik shyǵystardy qysqartý atqarýshy quramǵa qosymsha 30% - dan 60% - ǵa deıin ústeme tóleýge múmkindik berdi», dep jazdy Alık Shpekbaev Facebook-tegi paraqshasynda.
Onyń aıtýynsha, bonýstar qyzmetshilerdiń jumysynyń jyl boıǵy tıimdiligi men nátıjeliligine qaraı eskerilgen. Ol agenttik merekelik syıaqylardan bas tartyp, sol arqyly bárin teńestirýden «ketip», al ár qyzmetkerdiń qyzmeti jeke baǵalanatynyn atap ótti.
Alıek Shpekbaev jańa júıeniń nátıjelerimen bólisti.
«Agenttikte «úzdikter» de, sondaı-aq «ortashalar» da bar.Olardyń bonýstarynyń mólsheri osyǵan baılanysty. Qanaǵattanarlyqsyz jumys istegen «tómen baǵa alǵandarǵa» ol múldem berilmeıdi. Eger olar qyzmetke degen qarym-qatynasyn ózgertpese kelesi baǵalaýdyń nátıjesi boıynsha jumystan shyǵarylady. Eńbek aqy tóleýdiń jańa júıesiniń arqasynda áriptesterimiz áleýmettik-turmystyq jaǵdaılaryn edáýir jaqsartyp jatqany qýantady. Bireýleri kópten kútken turǵyn úı úshin bastapqy jarnany tóleı aldy, basqalary mashınaǵa nesıe resimdedi,úshinshileri ıpotekany jáne tutynýshylyq qaryzdaryn merziminen buryn ótedi.
Al bireýlerge jalaqysy ósken soń balalarynyń jeke kýrstary men shyǵarmashylyq úıirmeleriniń aqysyn tóleýge múmkindik aldy», - dedi A.Shpekbaev.
Agenttik tóraǵasy osyǵan qatysty naqty mysaldar keltirdi.
«Qýandyq Aıtaqyn - jas jigit, buryn qurylys gıpermarketinde jumys istegen. Konkýrs boıynsha memlekettik qyzmetke kelip, úsh jyl ishinde sarapshydan Memlekettik qyzmet departamentiniń bas konsýltantyna deıin ósti. Joǵary jalaqy men bonýstardan túsken jınaq esebinen ol 20% mólsherinde bastapqy jarnany engize otyryp páterdi Turǵyn úı qurylys jınaq banki arqyly resimdeı aldy.
Gúlnur Jaraspaeva - Strategııalyq ázirlemeler jáne Halyqaralyq baǵdarlamalar departamentiniń qyzmetkeri. Eki balanyń anasy. Onyń qamqorlyǵynda taǵy eki bala bar. Bonýstar oǵan balalardyń sapaly damýynda eleýli demeý bolady.
Qaıyrjan Sultanǵazıev - bizdiń Aqmola oblysyndaǵy departamenttiń qyzmetkeri. Jalaqyny kóterý qarajatty jınaqtaýǵa múmkindik berdi. Úzdik qyzmetker bolǵandyqtan jaqsy bonýstar aldy. Nátıjesinde 20% -yn tólep, salonnan nesıege jańa avtokólik satyp aldy», - dep jazdy Alık Shpekbaev.
Onyń aıtýynsha, bul mysaldar memlekettik qyzmette ádil jáne adal jumys isteı otyryp, óz otbasynyń ál-aýqatyn jaqsartýǵa bolatynyn dáleldeıdi.
Ol ilki joba jyl sońyna deıin jalǵasatynyn atap ótti. Taıaýda jobaǵa qatysatyn 3 memlekettik organda bonýs tólenedi dep kútilýde.
