Nashar paıdalanylǵan jerlerdi memlekettiń paıdasyna qaıtarý kerek - N. Nazarbaev
ASTANA. 10 sáýir. QazAqparat - Nashar paıdalanylǵan jerlerdi memlekettiń paıdasyna qaıtarý kerek. Búgin Aqordada ótip jatqan Kásipkerler keńesiniń otyrysynda Memleket basshysy Nursultan Nazarbaev osylaı málim etti.
«Shaǵyn fermerler ózderiniń jerin óńdeı almaı jatqan kezderi bolyp jatady. Onyń egisterinen taralǵan aramshóp jaqsy ıgerilgen egistikterge aýysyp jatyr. Osy oraıda alqabyn kútip ustap júrgen jerdiń ıesi bul turǵyda ne isterin bilmeı otyr»,-dep toqtaldy Elbasy.
Memleket basshysynyń paıymdaýynsha, atalǵan fermerler birikpese, olar qazirgi zamanǵy tehnıkany satyp alýǵa qaýqarsyz bolady. Sondyqtan ol óziniń jerin tıisti deńgeıde óńdeı almaıdy. Bul turǵyda Prezıdent mundaı fermerler birikpese tyńaıtqyshtar boıynsha jeńildikterge ıe bolmaıtynyn, lızıngke tehnıka alýda múmkin bolmaıtyndyǵyn tikeleı aıtý kerek ekendigin jetkizdi.
«Bul fermerlerden eshteńe tartyp almaıtyndyǵymyzdy aıtý kerek. Ol óziniń jerimen aktsıoner retinde kirip, ózine tıesili paıdany alady. Egistikti aramshóppen qunarsyzdandyryp, eshteńe óndirmeı kele jatqandar jaıly kóp aıtyp jatyrmyz. Mundaı fermerlik sharýashylyqtarǵa memleket tarapynan eshqandaı kómek bolmaıtyndyǵyn jarııa etý qajet. Al, osy jerdi qunarsyzdandyryp qurtqany úshin aıyppul salamyz. Bizdiń zańnamaǵa sáıkes nashar paıdalanylǵan jerlerdi memlekettiń paıdasyna qaıtarý kerek. Bul baǵyttaǵy jumystardy qatań qolǵa almasa bolmaıdy»,-dep túıdi N. Nazarbaev.
