Nashaqorlyqpen tıimdi kúresý úshin barlyq memlekettik qurylymdar men qoǵam birlese áreket etýi kerek
ASTANA. Qarashanyń 14-i. QazAqparat /Marlan Jıembaı/ - Búgin elordadaǵy S.Seıfýllın atyndaǵy Qazaq memlekettik agrarlyq-tehnıkalyq ýnıversıtetinde «Biz esirtkisiz álem úshin» atty respýblıkalyq ǵylymı-tájirıbelik semınar bastaldy,
dep habarlaıdy QazAqparat.
Uıymdastyrýshylardyń aıtýynsha, is-sharanyń negizgi maqsaty nashqorlyqqa qarsy kúreste qazirgi zamanǵy jańa tásilder men ádisterdi izdestirý bolyp tabylady. Semınarǵa qatysýshylar qazirgi ýaqytta respýblıkada esirtkige táýeldi azamattardyń sany kemýdiń ornyna, artyp kele jatqandyǵyna alańdaýshylyq bildirdi. Olardyń pikirinshe, buǵan Qazaqstannyń geografııalyq ornalasýy, ıaǵnı elimizdiń Aýǵanstan esirtkisin Reseı men Eýropa elderine tasymaldaýǵa qolaıly tranzıttik dálizde ornalasýy óz áserin tıgizip otyr. Osyǵan oraı semınarǵa qatysýshylar nashaqorlyqpen kúres boıynsha aldyn alý is-sharalaryn kúsheıtý qajet dep esepteıdi.
«Semınar qorytyndysy boıynsha usynystar jınaǵyn shyǵarý josparlanyp otyr. Jınaqtaǵy nashaqorlyqpen kúresti jetildirý boıynsha qabyldanǵan usynystarmen jergilikti atqarýshy organdar jete tanysýy úshin olarǵa jiberetin bolamyz. Sebebi osy máselelermen tikeleı aınalysatyn quqyq qorǵaý organdary jergilikti bılikpen birlesip áreket jasamasa, onda bul iste eshqandaı tıimdilikke qol jetkize almaımyz. Nashaqorlyqpen tıimdi kúresý úshin barlyq memlekettik qurylymdar men qoǵam birlese áreket etýi kerek», dedi «Áleýmettik-mádenı bastamalar ortalyǵy» qoǵamdyq birlestiginiń bas keńesshisi Quttybaı Ahmetov.
Alqaly jıyn jumysyna quqyq qorǵaý organdarynyń qyzmetkerleri, nashaqorlyq máselesimen aınalysatyn ǵylymı-tájirıbelik, medıtsınalyq-áleýmettik ortalyqtardyń ókilderi, ýchaskelik ıspektorlar, psıhologtar, t.b. mamandar qatysty. Semınarda respýblıkanyń 5 oblysynyń ókilderi bas qosty.
Q.Ahmetovtyń aıtýynsha, elordada aǵymdaǵy aıdyń ishinde taǵy úsh semınar ótetin bolady.
