Nashaqorlyqpen kúres: Kókshetaý jastary kvest-oıynǵa qatysty
KÓKShETAÝ. QazAqparat - Kókshetaýda Halyqaralyq nashaqorlyq jáne zańsyz esirtki aınalymyna qarsy kúres kúni qarsańynda qalalyq bilim ordalarynyń oqýshylary, stýdentteri jáne belsendi jastary arasynda kvest-oıyny ótti, dep habarlaıdy QazAqparat tilshisi.
Sharany Aqmola oblystyq Polıtsııa departamenti nashaqorlyqqa qarsy kúres qyzmetiniń qyzmetkerleri men oblystyq Jastar resýrstyq ortalyǵy birlesip uıymdastyrǵan.
Oblystyq Polıtsııa departamenti baspasóz qyzmetiniń málimetinshe, maqsat – oıyn túrinde qatysýshylardyń tanymdyq jáne oılaý úderisterin jandandyrýǵa yqpal etý, jastardy salaýatty ómir saltyn ustanýǵa tartý.
«Barlyq memlekettik organdar esirtkige qarsy ımmýnıtetti qalyptastyrýǵa baǵyttalǵan túrli aldyn alý is-sharalaryn jeke-jeke de, keshendi túrde de júzege asyrýda. Biz jastarmen jáne óskeleń urpaqpen jumys isteýdiń jańa joldary men ádisterin izdeımiz. Búgingi kvest – bul aldyn alýdyń, shyǵarmashylyq jáne qyzyqty oıynnyń jańa túri, onda qatysýshylar ózderin kórsetýge jáne komandada jumys isteýdi úırenýge múmkindik alady», - dep atap ótti oblystyq PD Esirtki qylmysyna qarsy kúres basqarmasynyń aǵa jedel ýákili Rázııa Kýrsanova.
Kvest-oıynǵa 7 komanda qatysty. Bir qyzyǵy, oıynǵa qatysýshylar áleýmettik jeliler arqyly tartyldy. Oıyn barysynda komandalarǵa hımııalyq qospa zattardyń aldyn alýdyń barlyq ádisterin tabý, zııatkerlik rebýstardy, krossvordtardy sheshý jáne búkil tapsyrmany múmkindiginshe tez aıaqtaý qajet boldy.
M.Ǵabdýllın atyndaǵy azamattyq qorǵaý akademııasy stýdentteriniń komandasy jeńimpaz atandy, ekinshi oryndy «Arna» joǵary kolledjiniń stýdentteri, úshinshi oryndy Kókshetaý joǵary medıtsınalyq kolledjiniń stýdentteri ıelendi. Oıynnyń barlyq qatysýshylary baǵaly syılyqtarmen marapattaldy.
