Nashaqorlyqtyń aldyn alý: Qyrǵyzstanda stýdentter jappaı tekseriletin boldy
ASTANA. KAZINFORM - Qyrǵyzstan bıligi jastar arasynda nashaqorlyqtyń aldyn alý úshin oqýshylar men stýdentterdi mindetti medıtsınalyq tekserýden ótkizýdi josparlap otyr, dep habarlaıdy Kazinform agenttiginiń tilshisi.
Tıisti qaýly jobasy qoǵamdyq talqylaýǵa shyǵaryldy. Qujatta sońǵy jyldary elde sıntetıkalyq esirtki men psıhotroptyq zattardy qoldanatyn jasóspirimder sanynyń artqany aıtylǵan.
Jobaǵa sáıkes, 9-11 synyp oqýshylary oqý jyly ishinde úsh ret esirtki men psıhotroptyq zattardy anyqtaýǵa arnalǵan taldaýdan ótýi tıis. Al kolledjder men joǵary oqý oryndarynyń stýdentteri oqý ornyna mundaı tekserýden ótkeni týraly anyqtama tapsyrýy qajet bolady.
Sondaı-aq esirtki qoldanǵany anyqtalǵan azamattardyń arnaıy tizimi jasalyp, esep júrgizý usynylǵan.
Jańa júıeni kezeń-kezeńimen engizý josparlanyp otyr. Alǵashqy kezeń 2026 jyldyń 1 qyrkúıeginen bastalmaq.
Pılottyq joba retinde tekserýler oqý oryndary kóp shoǵyrlanǵan Bishkek jáne Osh qalalarynda iske qosylady.
Bastama avtorlary bul sharalar jastar arasynda esirtkiniń taralýyn azaıtyp, bilim berý uıymdaryndaǵy profılaktıkalyq jumystardy kúsheıtýge múmkindik beredi dep esepteıdi.
Aıta keteıik, buǵan deıin Qyrǵyzstanda esirtki óndiretin jasyryn zerthananyń jumysy toqtatylǵan bolatyn. Al 2026 jyldyń qańtarynda Qazaqstan, Qyrǵyzstan, Reseı jáne Tájikstan azamattarynan quralǵan transulttyq esirtki tobynyń qyzmeti áshkerelengen edi.
Kamıla Taıtóleý
