Nashaqorlyqpen tek Іshki ister mınıstrligi kúresýge mindetti emes — Erlan Qarın
ASTANA.KAZINFORM — Búgin Memlekettik keńesshi Erlan Qarınniń tóraǵalyǵymen Qazaqstan Respýblıkasy Prezıdenti janyndaǵy Jastar saıasaty jónindegi keńestiń otyrysy ótti. Bul týraly Aqordanyń baspasóz qyzmeti habarlady.
Jıynda Nashaqorlyqqa jáne esirtki bıznesine qarsy kúres jónindegi 2026-2028 jyldarǵa arnalǵan keshendi jospardyń jobasy, sondaı-aq jastardy jumyspen qamtý jáne jumysshy mamandyqtarynyń mártebesin arttyrý máseleleri talqylandy.
Erlan Qarın Keńes músheleri Keshendi jospar jobasyna tereń taldaý júrgizip, basqa memleketterdiń tájirıbesin zerdelegenin, sonyń negizinde nashaqorlyqpen kúrestiń júıeli ári zamanaýı tásilderi usynylǵanyn atap ótti.
Memlekettik keńesshi is-sharalardy júzege asyratyn vedomstvolardyń jaýapkershiligi durys bólinbegenine nazar aýdardy.
— Іs júzinde Keshendi jospar jobasyndaǵy tarmaqtardyń jartysyna jýyǵy (110-nyń 52-si) Іshki ister mınıstrligine júktelgen, al qalǵanyn ózge memlekettik organdar (Densaýlyq saqtaý mınıstrligi, Oqý-aǵartý mınıstrligi, Mádenıet jáne aqparat mınıstrligi jáne t. b.) atqarady. Alaıda Keshendi jospar jobasynyń qazirgi nusqasynda nátıjege baǵdarlanǵan kórsetkishterdiń barlyǵy kúshtik qurylymdardyń jumysymen tikeleı baılanysty. Nashaqorlyqpen tek Іshki ister mınıstrligi kúresýge mindetti emes. Bul — ortaq jumys, ortaq jaýapkershilik. Sondyqtan áleýmettik blokqa jaýapty mınıstrlikter óz taraptarynan nashaqorlyqqa qarsy tıimdi kúres sharalaryn qosýy kerek. Sonda ǵana biz eskirtki bıznesine qarsy kúres pen narkotızmniń aldyn alý tásilderin teńdestiremiz, –– dedi Erlan Qarın.
Óz kezeginde Keńes músheleri nashaqorlyqqa qarsy kúreste quqyq qorǵaý jumystarymen birge profılaktıkalyq jáne salaýatty ómir saltyn dáripteý sharalary da qatar júrýge tıis ekenin quptady. Atalǵan jumys memlekettik organdar men qoǵamnyń birlesken kúsh-jigeri arqyly júıeli túrde júzege asyrylýy kerek.
Sonymen qatar Keńestiń birqatar múshesi jastardy jumyspen qamtý jáne jumysshy mamandyqtarynyń mártebesin kóterý máselelerine qatysty óz usynys-pikirlerin jetkizdi.
Jıyn qorytyndysy boıynsha Erlan Qarın múddeli memlekettik organdarǵa Jastar saıasaty jónindegi keńes músheleriniń usynystaryn muqııat zerdelep, odan ári pysyqtaýdy tapsyrdy.
Aıta ketelik Oljas Bektenov Nashaqorlyqtyń aldyn alý jáne esirtki qylmysyna qarsy is-qımyl jónindegi respýblıkalyq shtab otyrysyn ótkizgen edi.