«Nashaqorlardyń ordasyna aınalyp baramyz»: Pavlodarda dárihana preparattardy retsepsiz satyp kelgen
PAVLODAR. KAZINFORM — Oblys ortalyǵyndaǵy kópqabatty turǵyn úıdiń turǵyndary aýlada nashaqorlardyń tolyp ketkenine alańdap otyr. Aıtýlarynsha, buǵan sol jerde ornalasqan dárihananyń keıbir preparattardy zańsyz satýy sebep bolyp otyr.
Áleýmettik jelide taraǵan beınejazbada úı mańaıy men podezd ishinde nashaqorlar qoldanǵan shprıtster men ıneler, dári-dármektiń oramalary jatqany baıqalady.
Sondaı-aq vıdeoda nashaqorlardyń esirtki qoldaný sátteri bar. Bul vıdeolardyń barlyǵyn turǵyndar telefon jáne úıdegi beınekameralar arqyly túsirgen.
— Nazarbaev dańǵyly, 17-úıde qalyptasqan kúrdeli jaǵdaıǵa kóńil aýdarýlaryńyzdy suraımyz. Qoldanylǵan ıneler, shprıtster, zattardyń qaptamalary baspaldaq alańdarynda, lıftide, tipti balalardyń oıyn alańdarynda únemi shashylyp jatady. Úıimiz nashaqorlar jınalatyn orynǵa aınalyp barady. Bizdiń baqylaýymyzsha, osy jerdegi dárihanada nashaqorlar qoldanatyn, tyıym salynǵan preparattar zańsyz túrde satylýda. Dál janymyzda № 5 mektep ornalasqan, onyń aýlasynda da álgindeı zattar shashylyp jatyr, — dep jazdy atalǵan úı turǵyndarynyń biri.
Turǵyndar óz balalarynyń ómiri úshin qatty alańdaıtyndaryn, olardy dalaǵa jibermek túgili kireberiske shyǵarýdyń ózine qorqatyndaryn aıtady. Eresekter shashylyp jatqan qaýipti zattardy ózderi jınap áýrege túsedi. Bul máseleni bıylǵy qazan aıynda da kótergen. Alaıda jergilikti bılik eshqandaı áreket jasamaǵan.
Atalǵan jaıtqa oblystyq polıtsııa departamenti kóńil aýdaryp, esirtki qylmysyna qarsy is-qımyl jónindegi qyzmetkerler oqý orny men jaqyn mańdaǵy aýmaqty sholyp shyqqanyn málimdedi.
— Tekserý nátıjesinde N.Nazarbaev dańǵyly, 17 mekenjaıynda ornalasqan dárihanada dárilik preparattardy retsepsiz satý deregi anyqtaldy. Materıal jınalyp, is júrgizý sheshimin qabyldaý úshin Medıtsınalyq jáne farmatsevtıkalyq baqylaý komıtetiniń Pavlodar oblysy boıynsha departamentine jiberildi, — dep habarlady departamentten.
Sondaı-aq, bul aýdanda polıtsııa qyzmetkerleriniń avto jáne jaıaý patrýldeýi kúsheıtilgen. Azamattar arasynda quqyqtyq túsindirý jumystary júrgizilip jatyr.
Aıta keteıik, BQO-da sońǵy 3 jylda esirtkige qatysty 50-ge jýyq jas qylmystyq jaýapkershilikke tartyldy.