Nashaqorlardyń 50% Astana men Almatyda jáne Almaty oblysynda turady — QMA
ASTANA. KAZINFORM – QMA esirtki quraldary men prekýrsorlardyń taralýy turǵysynan Telegram messendjeriniń arnalary, áleýmettik jeliler men habarlandyrý servısteri qamtylǵan jahandyq jelige monıtorıng júrgizip jatyr. Nátıjesinde messendjerlerdegi 300-ge jýyq arna, tyıym salynǵan zattar satylatyn 4 iri Darknet marketpleıs kózge túsken. Ol týraly QMA-nyń baspasóz qyzmeti málim etti.
«El aýmaǵynda Telegram arnalary arqyly esirtki jáne psıhotroptyq zattardy turaqty negizde jarnamalaýmen jáne satýmen aınalysqan 80 paıdalanýshynyń jeke basy anyqtaldy. Internet-keńistiktiń Qazaqstandyq segmentine júrgizilgen monıtorıng nátıjesinde 35 myńǵa jýyq qatysýshysy bar esirtki satatyn 3 iri alań, esirtki zattarynynyń áleýetti tutynýshylary bolyp tabylatyn 10 myńǵa jýyq adamnyń jeke basy anyqtaldy», — delingen habarlamada.
QMA habarlaýynsha, nashaqorlardyń 50% astamy Astana men Almatyda sondaı-aq Almaty oblysyna tıesili.
Agenttik ótken jyly aınalymy 25,6 mlrd teńgeni quraıtyn 36 esirtki dúkenin anyqtaǵan.
Bıyl Telegram messendjerinde 60 esirtki arnasyna tıesili 59 kart-shot anyqtaldy.
«Qarjylyq barlaý bólimshesiniń aldyn ala taldaý qorytyndysy boıynsha atalǵan dúkenderdegi aqsha qarajatynyń jalpy aınalymy 3 mlrd teńgeni qurady. Aınalymy 82 mln teńgeni quraıtyn esirtki dúkenderiniń biri boıynsha materıaldar ІІM-ge joldandy», — dep habarlady QMA baspasóz qyzmeti.
QMA esirtkini qoldaný adam densaýlyǵyna jaǵymsyz áser etetinin eske salady.
«Esirtki arqyly jasóspirimderdiń densaýlyǵyna qaýip tónýi múmkin. Ata-analardan balańyzdyń minez-qulqyna, onyń densaýlyq jaǵdaıyna, aınalasyna nazar aýdaryp, ınternet keńistiktegi kórip júrgen kontentin baqylap, jasaǵan saýda-sattyǵyn sondaı-aq kartochkalyq shottaryna túsken qarajattyń kózderin baqylaýdy suraımyz», - dep eskertti QMA.
Esirtki quraldaryn satyp alý jáne saqtaý úshin qylmystyq jaýapkershilik qarastyrylǵanyn eske salamyz.
