Nashaqorlar sanynyń artýyna jeke ortalyqtar áser etýi múmkin
ASTANA. KAZINFORM – Jyl basynan beri esirtkige táýeldi adamdarǵa arnalǵan segiz jeke ońaltý ortalyǵyna aıyppul salyndy. Bul týraly Astana qalasy Qoǵamdyq densaýlyq saqtaý basqarmasynyń basshysy Aınur Tóleýova qalalyq máslıhattyń turaqty komıssııa otyrysynda málim etti.
Spıkerdiń aıtýynsha, bıyl 16 sáýirdegi jaǵdaı boıynsha Astana qalasynyń Psıhıkalyq densaýlyq ortalyǵynda esirtkige táýeldiligi bar, dıspanserlik esepte turǵan adamdar sany 10,7 paıyzǵa azaıyp, ótken jylmen salystyrǵanda 99 adamǵa kemigen. Qazirgi tańda esepte 822 adam tur, onyń ishinde tórt kámeletke tolmaǵan bar.
Sondaı-aq esirtkige táýeldiligi bar jáne alǵash ret esepke alynǵan adamdar sany 18,8 paıyzǵa tómendegen. Bıyl 13 jaǵdaı tirkelse, 2025 jyldyń sáıkes kezeńinde 16 jaǵdaı tirkelgen. Olardyń ishinde bes adam sıntetıkalyq esirtki tutynýshysy bolsa, ótken jyly bul kórsetkish 11 adamdy quraǵan.
– Psıhıkalyq densaýlyq ortalyǵynda dınamıkalyq baqylaýda turǵan esirtkige táýeldiler sanynyń azaıýy kóp jaǵdaıda narkologııalyq qyzmet kórsetýdiń jeke sektorda keńeıýimen baılanysty. Bul óz kezeginde patsıentterdiń bir bóliginiń jeke ońaltý ortalyqtaryna aýysýyna ákeldi, onda, ádette, qysqa merzimdi medıkamentozdyq kómek kórsetiledi. Qazirgi ýaqytta qalada shamamen 30 jeke ortalyq jumys isteıdi, olardyń sany da artyp keledi. Mundaı emdeý tájirıbesi jasyryn esirtkige táýeldi adamdar sanynyń ósýine sebep bolady, olar kóp jaǵdaıda aýrýdyń asqynǵan kezeńinde ǵana anyqtalady, – dedi vedomstvo ókili.
Onyń aıtýynsha, osy jyldyń birinshi toqsanynda Medıtsınalyq jáne farmatsevtıkalyq baqylaý komıtetimen birlesip júrgizilgen tekserýler barysynda osyndaı segiz jeke ońaltý ortalyǵy anyqtalyp, 2,7 mln teńgege aıyppul salynǵan.
Aıta keteıik, byltyr nashaqorlyq pen esirtki bıznesine qarsy kúres jónindegi keshendi jospar qabyldandy.
