NASA Jerdi qorshaǵan «sýtegi tájin» tirkedi

ASTANA. KAZINFORM — AQSh-tyń Ulttyq aeronavtıka jáne ǵarysh keńistigin zertteý basqarmasy (NASA) Jerdi qorshap turǵan, kózge kórinbeıtin sýtegi gazynan turatyn jarqyraǵan tájdi tirkegenin habarlady, dep jazdy Anadoly agenttigi.

NASA málimetinshe, 17 qarashada Carruthers Geocorona Observatory observatorııasy Jer men Aıdyń ýltrakúlgin sáýledegi sýretterin jarııalaǵan. Jańa túsirilimderde planetamyzdy aınala qorshaǵan sýtegiden quralǵan jaryq táj anyq baıqalady.

Vedomstvonyń túsindirýinshe, geokorona (latyn tilindegi «Jer táji» degen maǵynany bildiredi) — atmosferanyń eń syrtqy qabatyndaǵy sýtegi atomdarynan túziletin qabyq. Ol ǵarysh keńistigine óte alys qashyqtyqqa deıin sozylady.

Sonymen qatar bul jarqyraǵan gazdy ýaqyt óte kele turaqty túrde baqylaý josparlanyp otyr. Bul ǵalymdarǵa geokoronanyń ózgerisin dınamıkada zertteýge múmkindik beredi.

Qazirgi tańda Carruthers Geocorona Observatory Jerden shamamen 1,6 mıllıon shaqyrym qashyqtyqtaǵy arnaıy orbıtaǵa baǵyt alyp bara jatyr. Kútilgendeı, observatorııa naýryz aıynda negizgi ǵylymı mıssııasyn bastaıdy. Jetildirilgen túsirý ádisteriniń arqasynda ol ǵaryshtyq zertteýler salasyndaǵy jańa ǵylymı jańalyqtarǵa jol ashady.

Aıta keteıik, NASA Aıda adam basqaratyn mıssııany iske qospaq.