NASA Ýrannyń 29-shy serigin tapqanyn habarlady

ASTANA. KAZINFORM — AQSh-tyń Ulttyq aeronavtıka jáne ǵarysh keńistigin zertteý basqarmasynyń (NASA) ǵalymdary «Djeıms Ýebb» teleskopynyń kómegimen Ýrannyń jańa – 29-shy serigi S/2025 U1-di ashty, dep jazdy AZƏRTAC.

AZƏRTAC agenttiginiń habarlaýynsha, bul týraly aqparat NASA-nyń resmı saıtynda jarııalanǵan.

— Bul — kishkentaı ǵana serik, biraq mańyzdy jańalyq. Tipti NASA-nyń ǵaryshtyq apparaty «Voıadjer-2» osydan 40 jyl burynǵy ushýy kezinde ony baıqaı almady, — delingen habarlamada.

Anyqtalǵandaı, serik jaqyn ınfraqyzyl dıapazonda jumys isteıtin kameramen túsirilgen, árqaısysy 40 mınýttyq uzaq ekspozıtsııamen jasalǵan on sýret serııasynan tabylǵan. Onyń dıametri nebári 10 km shamasynda, bul ony Ýran orbıtasyndaǵy eń kishi serik etedi.

— Ol Ýrannyń ortalyǵynan shamamen 56 myń km (35 myń mıl) qashyqtyqta ornalasqan, planetanyń ekvatorıaldyq jazyqtyǵy boıymen, Ofelııa men Bıanka serikteriniń orbıtalarynyń arasynda aınalyp júr. Onyń orbıtasy derlik sheńber pishindi jáne qazirgi ornalasýyna jaqyn jerde qalyptasqan dep boljanyp otyr, — dedi Kún júıesin zertteý ǵylymı bóliminiń jetekshi ǵylymı qyzmetkeri, SwRI ınstıtýtynyń mamany Marıama El Mýtamıd.

Buǵan deıin habarlanaǵndaı, NASA qyzmetkerleriniń sany 20%-ǵa qysqarady.