NASA Starliner basqaratyn ǵarysh kemesiniń alǵashqy ushyrylymyn keıinge qaldyrdy
ASTANA. KAZINFORM – Ushyrylymǵa eki saǵat qalǵanda AQSh-tyń Ulttyq aeronavtıka jáne ǵarysh basqarmasy (NASA) Boeing kompanııasynyń Starliner basqaratyn ǵarysh kemesiniń Halyqaralyq ǵarysh stantsııasyna (HǴS) alǵashqy ushyrýdan bas tartty, dep habarlaıdy DW aqparat agenttigi.
Dúnıejúzilik BAQ-tyń 7 mamyr, seısenbi kúni tańerteń habarlaǵanyndaı, buǵan Starliner-di orbıtaǵa shyǵarýy tıis United Launch Alliance (ULA) óndirgen Atlas-V zymyran tasyǵyshynyń ottegi shyǵarý klapanyndaǵy aqaý sebep bolǵan.
Starliner basqarylatyn ǵarysh kemesi 6 mamyrda Kanaveral múıisindegi ǵarysh aılaǵynan jergilikti ýaqyt boıynsha saǵat 22:34-te ushyrylady dep josparlanǵan bolatyn. NASA astronavtary Berrı «Býtch» Ýılmor men Sýnıta Ýılıams Jerge oralmas buryn HǴS-ta shamamen bir apta bolady dep boljanǵan.
NASA basshysy Bıll Nelsonnyń X áleýmettik jelisinde ushyrýdan bas tartý týraly túsinikteme bergeninde onyń basty basymdyǵy ǵaryshkerlerdiń qaýipsizdigi ekenin aıtty.
«Biz daıyn bolǵan kezde ushyramyz», - dep qosty ol naqty kúndi atamaı.
«Sizge zymyran qajet bolsa, bizge habarlańyz», - dep jazdy SpaceX negizin qalaýshy Ilon Mask.
Boeing SpaceX-pen birge NASA-nyń Commercial Crew Program baǵdarlamasyna qatysady. Onyń maqsaty – ǵaryshkerlerdi ǵaryshqa jetkizý. Boeing NASA kelisimsharty boıynsha ekıpaj kapsýlasyn ázirleý úshin 5 mlrd dollardan astam, al SpaceX 3,1 mlrd dollar qarajat aldy. SpaceX astronavttardy Crew Dragon kemelerimen tasymaldaý boıynsha birneshe mıssııany oryndady.
