NASA Orion ǵarysh kemesin Aıǵa ushyrdy

ASTANA. KAZINFORM — NASA tórt astronavty bar Orion ǵarysh kemesin Space Launch System (SLS) zymyrany arqyly Aıǵa ushyrdy, dep habarlaıdy TASS.

Ǵarysh kemesi Florıda shtatyndaǵy Djon Kennedı atyndaǵy ǵarysh ortalyǵy alańynan, jergilikti ýaqyt 18:35–de ushyryldy.

Ekıpaj quramynda Rıd Vaızman, Krıstına Koh, Vıktor Glover jáne Djeremı Hansen bar. Olardyń mindeti Aıdy aınalyp ótip, Jerge qaıta oralý. Mıssııanyń uzaqtyǵy shamamen 10 kún bolady.

Belgili bolǵandaı, ushyrylymǵa 1 jarym saǵat qalǵanda ınjenerler qashyqtyqtan ushýdy toqtatý júıesinde aqaý anyqtaǵan, biraq ony tez arada retke keltirdi.

Aıǵa sońǵy ret adam 1972 jyldyń jeltoqsan aıynda AQSh-tyń «Apollon-17» mıssııasy aıasynda ushyryldy. 2019 jyldyń kókteminde NASA Aıǵa arnalǵan Artemis («Artemıda») baǵdarlamasyn jarııalady, ol úsh kezeńnen turady. Birinshi kezeń, Artemis I, Orion ǵarysh kemesi arqyly Aıǵa qonbaı aınalyp ótip, Jerge oralý. Bul 2022 jyly 16 qarasha-11 jeltoqsan aralyǵynda iske asty. Ekinshi kezeń, Artemis II, ekıpajben Aıdy aınalyp ótýge baǵyttalǵan. Úshinshi kezeń, Artemis III, NASA astronavttardy Aı betine qondyrýdy josparlap otyr. AQSh kólik mınıstri Shon Daffı 2025 jyly maýsym aıynda aıǵa qoný aldaǵy 3,5 jyl ishinde júzege asýy múmkin ekenin málimdedi. Al buǵan deıin NASA ony 2027 jyldyń ortasyna josparlaǵan edi.

Eske salsaq, Orion ǵarysh kemesindegi mıssııa Aıǵa sońǵy 50 jyldan astam ýaqyttaǵy alǵashqy adam qatysqan ekspedıtsııa bolady. Artemis II ekıpajy tek joǵary deńgeıdegi kásipqoı mamandar emes, sonymen birge myqty jeke tarıhy, otbasy jáne ǵylymnan tys motıvatsııasy bar astronavttar. Olardyń árqaısysy uzaq daıyndyq pen irikteýden ótti.

Buǵan deıin NASA Aıǵa qonýdy 2028 jylǵa shegergeni týraly jazdyq. Sodan keıin AQSh basqarmasy Aıda baza salý jáne ıadrolyq ǵarysh kemesin ushyrý týraly habarlady.