NASA mıssııanyń keıinge qaldyrylýyna sebepker bolǵan ǵaryshkerdiń esimin jarııalady

ASTANA. KAZINFORM — NASA qańtar aıynda Halyqaralyq ǵarysh stantsııasynda densaýlyǵyna qatysty máseleler týyndaǵan ekıpaj múshesi astronavt Maık Fınke bolǵanyn málimdedi, dep jazady NBC News. 

NASA «Fınkeniń ótinishi boıynsha» jarııalaǵan málimdemesinde zeınetker astronavt 7 qańtarda densaýlyǵyna qatysty máseleler týyndaǵanyn jáne ǵarysh stantsııasy ekıpajynyń «shuǵyl aralasýyn» qajet etkenin habarlady.

— Olardyń jedel áreketiniń jáne NASA-nyń avıatsııalyq hırýrgteri usynystarynyń arqasynda meniń jaǵdaıym tez turaqtandy, — delingen 58 jastaǵy Maık Fınkeniń málimdemesinde.

Fınke óz málimdemesinde Crew 11 ekıpajyndaǵy áriptesterine, sondaı-aq sol kezde ǵarysh stantsııasy bortynda bolǵan jáne áli kúnge deıin ǵaryshta júrgen NASA astronavty Krıs Ýılıams pen reseılik ǵaryshkerler Sergeı Kýd-Sverchkov pen Sergeı Mıkaevqa alǵysyn aıtty. Fınke sondaı-aq NASA, SpaceX qyzmetkerlerine jáne La-Hoııadaǵy Skrıpps memorıaldyq aýrýhanasynyń medıtsınalyq qyzmetkerlerine alǵysyn bildirdi.

Fınke ózinde «bári jaqsy» ekenin jáne Hıýstondaǵy Lındon Djonson atyndaǵy Ǵarysh ortalyǵynda ushýdan keıingi standartty qalpyna keltirý protsedýralaryna belsendi qatysyp jatqanyn habarlady.

Ǵaryshkerdiń aýrýynyń sıpaty habarlanǵan joq.

Osyǵan deıin NASA Artemis 2 aı mıssııasyn keıinge shegergenin habarlaǵan bolatynbyz.