NASA 3I/ATLAS kometasynyń jaqynnan túsirilgen sýretterin jarııalady
ASTANA. KAZINFORM — NASA sársenbi kúni bizdiń Kún júıemizge jyldam jaqyndap kele jatqan, ári bir-aq ret «qonaq» bolatyn juldyzaralyq 3I/ATLAS kometasynyń jaqynnan túsirilgen kadrlaryn usyndy.
Ótken jazda anyqtalǵan bul kometa 3I/ATLAS degen ataýmen belgili, ol – bizdiń ǵarysh aımaǵymyzǵa kelgen úshinshi rastalǵan juldyzaralyq nysan. Ótken aıda ol Marstyń janynan ushyp ótti.
Mars orbıtasynda jáne oǵan jaqyn mańda ornalasqan NASA-nyń birneshe ǵarysh apparaty kometa bar bolǵany 29 mln shaqyrym qashyqtyqta ushyp ótkende onyń úlken plandaǵy sýretterin túsirdi. Kometanyń qozǵalysyna Eýropalyq ǵarysh agenttiginiń Mars tóńireginde aınalyp júrgen eki spýtnıgi de baqylaý júrgizdi.
Al astronomdar bizdiń planetaǵa jaqyndap kele jatqan kometaǵa Jerdegi teleskoptardy baǵyttap jatyr. Qazir ol Jerden shamamen 307 mln shaqyrym qashyqtyqta ornalasqan. Virtual Telescope jobasynyń mamany Djanlýka Mazı sársenbi kúni Italııadan kometanyń úlkeıtilgen sýretin aldy.
Kometa Jerge eń jaqyn 269 mln shaqyrym qashyqtyqqa jeltoqsan aıynyń ortasynda keledi. Odan keıin ol qaıtadan juldyzaralyq keńistikke ushyp ketedi jáne qaıtyp oralmaıdy.
ıÝpıterge bet alǵan Eýropalyq ǵarysh agenttiginiń Juice ǵarysh apparaty osy aı boıy, ásirese onyń Kúnge eń jaqyn núkteden ótkeninen keıin óziniń kameralary men ǵylymı quraldaryn kometaǵa baǵyttap keldi. Alaıda ǵalymdar bul baqylaýlardyń nátıjelerin aqpan aıyna deıin ala almaıdy, sebebi Juice apparaty Kúnge tym jaqyn ushqan kezde onyń negizgi antennasy jylý qalqany retinde paıdalanylady, bul málimet jiberý múmkindigin shekteıdi.
Kometany Jerden dúrbi nemese teleskop arqyly tańǵa jýyq kórýge bolady.
Aıta keteıik, buǵan deıin NASA juldyzaralyq nysan – 3I/ATLAS kometasynyń sýretterin tikeleı efırde kórsetetinin jazdyq.